Дээрхийн гэгээн 14 дүгээр Далай ламын 90 насны төрсөн өдрийг угтан олон зуун сүсэгтэн Энэтхэгийн Дармасала хотод цуглараад байна.

Энэ ням гарагт болох түүний 90 насны төрсөн өдөр сүсэгтэн олонд чухал үйл явдал болж буй. Учир нь Далай лам 90 насныхаа ойгоор өөрийн хойд дүрийг тодруулна хэмээн дурдсан.

Энэ долоо хоногт Далай ламын хойд дүр тодрох болов уу гэсэн өндөр хүлээлт үүсээд байна. Түүний төрсөн өдрийг угтаж лхагва гаргаас эхлэн гурван өдөр үргэлжлэх Төвөдийн шашны 15 дахь бага хурлыг зохион байгуулна.

Тэрбээр даваа гарагт болсон цугларааны үеэр "Далай ламын институт тодорхой нэг хүрээ, зохицуулалтын дагуу цаашид үргэлжилнэ" хэмээн мэдэгджээ. Гэхдээ энэ талаар дэлгэрэнгүй мэдээлэл өгөөгүй аж.

Далай лам 2011 онд "90 нас хүрмэгцээ уг институтийг үргэлжлүүлэх эсэхээ лам нар болон ард түмэнтэй зөвлөлдөн шийднэ" хэмээж байв.

Далай лам энэ оны гуравдугаар сард гаргасан номдоо хойд дүр нь Хятадын гадна, чөлөөт ертөнцөд төрнө хэмээн бичсэн юм. Хойд дүрийг тодруулах асуудал нь зөвхөн Төвөдийн шашинтууд төдийгүй Хятад, Энэтхэг, АНУ зэрэг улс орнуудад ч чухал үйл явдал болоод байна.

Тэрбээр 1935 онд Төвөдийн хөдөө тосгонд төрсөн бөгөөд хоёр настайд нь 13 дугаар Далай ламын хойд дүр хэмээн тодруулсан байдаг. Бага наснаасаа Төвөдийн сүмд сурч, буддын гүн ухааны докторын зэрэг хамгаалсан.

1959 онд Хятадын эрх баригчдын дарамтаас зугтан 80 мянга гаруй дагалдагчтайгаа Энэтхэг рүү дүрвэж, Дармасалад төвтэй Төвөдийн түр Засгийн газрыг байгуулсан юм.

Эх сурвалж: ВВС