УИХ-ын гишүүн Г.Лувсанжамц Төрийн ордонд сэтгүүлчдийн асуултад хариулав.    

-Ардын хүүхдүүд бүгд хувийн сургуульд явж чадаж байна уу? Үгүй. Иймээс улсын сургуулиа дэмжинэ.

Алдагдалтай ажилладаг хувийн сургууль байдаг гэж бодохгүй байна. Япон, БНСУ, Сингапур хүнээ хөгжүүлж хөгжсөн. Эдгээр улсуудад газрын баялаг байхгүй. Гэхдээ ерөнхий боловсролын тогтолцоонд маш их анхаардаг. Үр дүнг нь PISA хэмээх олон улсын, хөндлөнгийн байгууллагын шалгалтаар хэмждэг.

Хувийн хэвшил номын сан байгуулах гэх мэт ямар нэг үйл ажиллагаа явуулбал улсын сургуулийг л дэмждэг. Манай улсад улсын болон хувийн сургуулийн хүүхдүүд газар тэнгэр шиг ялгаатай болчихлоо. Зайсанд сурч буй хүүхэд Баянхошуутай ярилцлаа гэхэд нэг нь англиар л ярих болов уу. Гэтэл нөгөө хүүхэд нь ангидаа 50-60-уула суудаг. Иймд боловсролын чанар хүртээмжид анхааръя. 

Барууны жишгээр боловсролын тогтолцоогоо хөгжүүлэх гэж байгаа бол тэдэн шиг эдийн засгийн хүч чадалтай болох ёстой. 

-2026 оныг боловсролыг дэмжих жил болгон зарласан. Улсын сургууль цэцэрлэг шинээр барих гэхээр сонгон шалгаруулалтад компаниуд ордоггүй гэж Сангийн сайд хэлсэн. Иймээс хувийн сургуулиудыг дэмжих болжээ.
-Засгийн газраас өргөн барьсан хуулийг мэдээж Засгийн газрын гишүүн хамгаална. Б.Жавхлан сайд МАН-ын гишүүн тул социал демократ үзэл баримтлалтай гэж найдаж байна.

Манай улсад боловсрол, эрүүл мэндийг бизнес болгож болохгүй. Манай эдийн засаг тэр хэмжээнд хүрээгүй. Барилга барих сонгон шалгаруулалтаа жишиг үнээр зарладаг. Энэ үнийг цар тахлаас хойш шинэчлээгүй. Иймээс барилгын компаниуд орохгүй байна. Барилгын салбарынхантай уулзахад жишиг үнийг хөндөн шүүмжилдэг. Зэх зээл үнэ тогтоох байтал улс нь та ийм үнээр ажил хий гэж болохгүй.

Хүчлэх нь буруу. Би энэ хуулийн төслийг хэлэлцэх үед эсрэг санал өгнө гэв.                         

Монгол Улсын 2025 оны төсвийн төслийг өнөөдөр УИХ-ын чуулганаар хэлэлцэн, Төсвийн байнгын хороо руу хэлэлцүүлэгт бэлтгүүлэхээр шилжүүлсэн. Ирэх долоо хоногт УИХ энэ төслийг эцсийн удаа хэлэлцэн батална.