Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх УИХ-ын Хянан шалгах түр хорооны нотлох баримтыг шинжлэн судлах сонсгол үргэлжилж байна.

Гэрт буюу тухайн үеийн Үндэсний аюулгүй байдлын зөвлөлийн гишүүн Д.Лүндээжанцан “Сая шинжээчийн дүгнэлтийг сонсоод тухайн үеийн зүйлсийг нэлээд сэргээн саналаа.  2010 онд би дурсамжийн ном бичсэн. Тэр номд сэтгэл зовоож, чөмөг дундалж байж шийдсэн асуудал бол яах аргагүй энэ гэрээ байсан гэж бичжээ, би.

2008 онд эдийн засгийн хямрал тулчихсан, ганц Эрдэнэттэй, хоёр гурван саалийн үнээтэй байхгүй бол болохгүй нь гээд энэ асуудалд бүгд анхаарч, оролцсон. Тэр үед парламентын засаглалын дархлаа харагдсан гэж би боддог. Ганц хүн биш олон талаас нь яриул дархлаанд хэрэгтэй гээд бүгд хэлэлцсэн.

Хэлэлцэж, хэлэлцэж Монголын төр 34 хувийг авах хувилбарыг сонгосон тохиолдолд Монголын төрд ногдох өгөөж нь 74 хувь, нэрлэсэн үнээр 53 хувь. Харин 34 хувь эзэмшихгүй хувилбарыг сонгох буюу бүтээгдэхүүн хуваах тохиолдолд Засгийн газарт ногдох өгөөж нь тэр үеийн үнэ цэнээр 66 хувь, нэрлэсэн үнэ нь 41 хувь гэсэн зүйлийг бидэнд танилцуулж байсан. Ажлын хэсэг гэхээр С.Баярцогт сайд зэрэг хүмүүс гэсэн үг. 

Миний сэтгэлийг хамгийн их эмзэглүүлж байгаа асуудал бол тэр үед 2 орчим тэрбум ам.доллар гэж байсан зардал одоо бараг 20 орчим тэрбумд хүрсэн гэв үү, тэгж сонслоо. Энэ бүр арай хэтэрхий.

Тухайн үед тогтоол шийдвэр, чиглэл гаргасан бидэнд алдаа, оноо байсныг үгүйсгэхгүй, гэхдээ хана нь гайгүй гарсан. Шинэ нөхцөл үүссэн, хөрөнгө оруулалтын зардал асар их нэмэгдсэн, үүнээс болоод зээлийн төлбөр нэмэгдсэн. Үүнээс болоод нөгөө 34 хувийн ашиг авах хугацаа улам хойшилсон, бид хүлээгээд л байдаг. Гүний уурхай ашиглалтад орчихвол юм бүхэн сайхан болно гээд бид хүлээгээд л байсан. Энэ мэтчилэн асуудал сүүлийн жилүүдэд их өрнөжээ” гэв.