“Харанга” хамтлагийн дуу­чин Х.Лхагвасүрэн болон бусад хүмүүст холбогдох хар тамхины хэргийг шүүх хурал өчигдөр Ганц худаг дах урьдчилан хорих төвийн хурлын зааланд боллоо. Шүүх хурал 10 цагаас хэмээн зарлагдаж байсан ч С.Ал­танцэцэг өмгөөлөгчийг хүлээ­сээр 11.20 цагт ирц бүрдэж эхэлсэн юм. Шүүх хурлын тан­химд яллагдагч Х.Лхагвасүрэн бохь зажилж, инээмсэглэсээр орж ирсэн. Түүний сэтгэл санаа их л өөдрөг мэт.

Нээлттэй хэмээн зарлагд­сан  шүүх хурлыг дар­галагч Сүхбаатар дүүргийн шүүгч н.Сүхбаатар сэтгүүлчдэд хаалттай явуулах шийдвэр сонсгож, хэвлэлийнхнийг  тан­химаас гаргав. Урд нь хоёр удаа хойшилсон шүүх хурал ийнхүү 100 хувийн ирц бүрдэн эхэллээ. Хурал дээр Х.Лхагва­сүрэн “Би нойр булчирхайн өвчтэй хүн. Эдгээх санаа­тай таньдаг маарамба дээ­рээ очсон чинь тэр бодисыг өгсөн юм. Одоо тэр маа­рамба нас барчихсан” гэж мэдүүлж байв.Шүүгдэгч Х.Лхагва­сүрэн, Б.Гантулга, Н.Номин-Эрдэнэ, Б.Бат­буян нар өчигдрийг хүртэл урьдчилан хорих төвд хо­риг­дож байсан билээ. Харин “Ice Top” хамтлагийн дуучин А.Манлайжаргал, С.Чулуун­баяр, “Салхи” хамт­лагийн Г.Жавхлан, С.Дөлгөөн, Ц.Элбэрэл нар батлан даал­тад гарсан бай­сан.

Х.Лхагвасүрэн болон Б.Батбуян, Б.Гантулга, Н.Номин-Эрдэнэ нарыг ман­суу­руулах бодис хууль бусаар олж авсан, хад­галсан, борлуулсан, хэрэг­лэсэн гэсэн үндэслэлээр прокуророос яллах дүгнэлт бичсэнийг шүүх хурлын шинэчилсэн мөрдөн бай­цаал­таар нотлох ажиллагаа явагдсан байна. 

Шинэчилсэн мөрдөн байцаалтад “Ice Top” хамт­лагийн дуучин С.Чулуунбаяр “Х.Лхагва­сүрэн ахыг мансууруулах бодис зарж байгааг мэдээд С.Дөлгөөнөөс 75 мянган төгрөг зээлж А.Манлай­жаргалтай хамт “FM-107.5”-ын тэнд байдаг Х.Лхагваа ахын гэрт очсон юм. А.Ман­лайжаргал үүдэнд үлдэж, би дотогш орсон. Тэгэхэд Х.Лхагваа ах хумсны то­лион чинээ хар ногоон өнгийн бодис гаргаж ирээд тугалган цаасан дээр тавьж шатаагаад үнэрлүүлсэн. Үнэхээр сайхан санагдсан. Дуу дуулахад онгод ордог хэмээн хэлсэн” гэж мэ­дүүлэв.

Үүний дараа Х.Лхагва­сүрэн “Би С.Чулуунбаатарт зараагүй. Тэр манайд ирээ­гүй” гэв. Тэдний өгч авал­цаж байсныг гэрчлэх хүн нь Х.Лхагвасүрэнтэй хамт амь­дардаг н.Мөнхбаяр хэ­мээн С.Чулуунбаатар мэ­дүүлэв. Тэрбээр “Намайг ороход н.Мөнхбаяр цаад өрөөнд унтаж байсан” гэхэд н.Мөнхбаяр “Манайд тэр өдөр ямар ч хүн ирээгүй” гэх мэтээр тэд гэм бурууг бие биендээ нялзаан тохохыг эрмэлзэн маргаж байлаа.

Харин Б.Гантулга Төв аймгийн Лүн сумаас Намир­цэцэг хэмээх ургамал түүж, түүнийгээ тугалган цаасан дээр шатаан үнэрлэдэг бай­сан гэнэ. Тэрбээр “Б.Бат­буянтай хамт 2-3 удаа түүж ирж байсан удаатай. Н.Номин-Эрдэнэ бялуу хийх авьяастай л даа. Нэг өдөр бялуунд аяганы тал бодис хийсэн чинь бялуу юу ч үгүй хав хар болчихсон. Тэгэхээр нь гайхаад Х.Лхаг­ваа ахад үзүүлэхээр тэд­нийд очсон юм. Гэтэл Х.Лхаг­ваа ах унтаж байхаар нь ширээн дээр нь тавиад гарч яваад цагдаа нарт баригдсан” хэмээн мэдүү­лэв.

Улмаар цагдаагийнхан машины тээшийг сөхөхөд мансууруулах бодис гарч иржээ. Цагдаагийнхан Х.Лхагва­сүрэнгийн гэрт очин үзлэг нэгжлэг хийгээд өнөөх, бялуу болон гэрт нь хадгалагдаж байсан мансууруулах бодис олж, хураан авчээ.

Хурал дээр Х.Лхагва­сүрэн “Би нойр булчирхайн өвчтэй хүн. Эдгээх санаа­тай таньдаг маарамба дээ­рээ очсон чинь тэр бодисыг өгсөн юм. Одоо тэр маа­рамба нас барчихсан” гэж мэдүүллээ.  Мөн Б.Гантулга, Н.Номин-Эрдэнэ, Б.Бат­буян нарыг Ирланд улсын иргэнд мансууруулах бодис зарсан үйлдэлд нь ял төлөв­лөсөн ч тэд үүнийг хүлээн зөвшөөрөхгүй байгаа аж.

Улсын прокуророос Б.Гантулга, Н.Номин-Эрдэнэ, Б.Батбуян нарт арван жил, Х.Лхагвасүрэнд долоон жилийн хорих ял эдүүлэх дүгнэлт гаргаж, шүүхэд ирүүлснийг шүүх хурлын үед тэд хүлээн зөвшөөрсөнгүй. 

Тэдний өмгөөлөгч “Ирланд улсын  иргэнд борлуулж байс­ныг нь хар­сан гэрч, нотлох баримт байхгүй. Тиймд энэ гурав мөн, бишийг тогтоох бо­ломжгүй. Дээр нь тэрхүү Ирландын иргэн олон жил мансууруулах бодис хэрэг­лэсэн сэтгэцийн өвчтэй гэдэг нь тогтоогдсон” гэсэн юм. 

Харин,  Ц.Элбэрэл, Г.Жавх­лан, С.Дөлгөөн нарт нэг удаа хэрэглэсэн гэдэг үндэслэлээр зургаан сар хорих ял сонсгоод бай­гаа .

Шүүх хурлын шинэ­чилсэн мөрдөн байцаалт дугаар шилжих мөчид дуу­сав. Х.Лхагвасүрэн долоон жил, Б.Батбуян, Н.Номин-Эрдэнэ 10 жил арав хоног, Б.Гантулга 11 жил, харин Ц.Элбэрэл, С.Дөлгөөн нар цагааджээ.

Л.Нинжсэмжид