Хятад нэрийн өргөст хэмх, улаан лоолийг Монгол хэмээн худалдаалж байгаа нь нотлогдов.

“Өдрийн сонин”-ы өнөөдрийн дугаарт “Хятад лооль, өргөст хэмхийг монгол хэмээн зарж байна” гэсэн мэдээлэл нийтлэгдсэн байна.

Энэ мэдээллийн дагуу ШӨХТГ-аас Чингэлтэй дүүргийн нутаг дэвсгэрт байрлах Урт цагааны гудамж, Бөмбөгөр худалдааны төвүүдийн гадаах талбайд жимс, хүнсний ногооны худалдаа хийж буй иргэдтэй уулзан тодруулахад хятад нэрийн өргөст хэмх, улаан лоолийг монгол хэмээн худалдаалж байгаа нь илэрчээ.

Иймээс зөвшөөрөгдсөн цэгээс бусад нийтийн эзэмшлийн гудамж, талбайд ил задгай зарагдаж буй баталгаагүй жимс, ногоо, хүнсний бүтээгдэхүүн худалдан авахгүй байхыг иргэдэд сэрэмжлүүлж байна.

ШӨХТГ-аас энэ байдлыг таслан зогсоох талаар олон нийтийн мэдээллийн хэрэгсэлээр сэрэмжлүүлэг хүргэх болон хэрэглэгчийн эрүүл мэндэд харшлах, тэднийг төөрөгдүүлсэн дээрхи үйл ажиллагааг таслан зогсоох талаар хууль тогтоомжоор хүлээсэн үүргээ биелүүлэх талаар Нийслэл, дүүргийн Засаг дарга нарт албан тоот хүргүүлжээ.

Х.Алтанзагас