Чингэс зочид буудлын хурлын танхимд  "Насан туршийн боловсрол: өчигдөр, өнөөдөр, маргааш" үндэсний форум эхэллээ. Форумын зорилго нь нээлттэй их сургууль байгуулж ямар ч насны хэнд ч боловсрол олгох боломжийн талаар хэлэлцэв.

Форумд 21 аймгийн Боловсрол соёлын газрын дарга, албан бус боловсрол олгох үндэсний төвийн мэргэжилтнүүд, энэ чиглэлээр үйл ажиллагаа явуулдаг төрийн болон төрийн бус байгууллагын төлөөлөгчид зэрэг нийт 120 гаруй төлөөлөгч оролцов. БШУЯ-наас 2010- 2021 онд хэрэгжүүлэх "Боловсрол" үндэсний хөтөлбөрийн зорилтод "Албан бус боловсролыг шинэчлэн өргөтгөж, иргэдэд чиглэсэн насан туршийн боловсролын нээлттэй тогтолцоог төлөвшүүлэх"-ээр заасны дагуу Насан туршийн боловсролын үндэсний төвийн оролцоог дүгнэж, дараагийн зорилтын талаар ярилцаж байна.

Төвийн мэргэжилтэн С. Ундрал хийсэн ажлаа танилцуулсан юм. Тэд үйл ажиллагааныхаа хүрээнд санхүүжилт ихтэй салбар буюу сургууль завсардсан хүүхдүүдтэй түлхүү ажиллажээ. Тус хөтөлбөр нь бүх нийтийн албан бус боловсролд зориулсан учраас 40 нас хүрсэн эмэгтэй эмч болохыг хүсвэл "Насан туршийн боловсрол олгох үндэсний төв"-д хандаж суралцах боломжтой аж.

Түүнчлэн хичээл завсардсан хүүхдүүд болон хүссэн  салбартаа  суралцах насан хүрэгчдэд ч хүрч үйлчлэх учир хэн бүхэнд нээлттэй юм байна.  Одоогоор 21 аймгийн 370-аад сумд, Улаанбаатар хотын дүүргүүдэд төвийн багш, мэргэжилтнүүд иргэдэд боловсрол олгож байгаа аж. Цаашдаа нээлттэй их сургууль болон өргөтгөхөөр зорьж байгаа.

Мэдээлэл технологи хурдацтай хөгжиж байгаа энэ үед уламжлалт чиг хандлага эрс өөрчлөгдөж "хэн ч, хэзээ ч, хаана ч" хэрэгцээт мэдлэг, боловсролоо олж авах арга зүйг манай төв олгодог" хэмээн төвийн мэргэжилтэн хэлэв.  

Мөн үеэр аймаг, сум, дүүргүүдийн албан бус боловсролын төвд суралцаж байгаа суралцагчдын гараар урласан бүтээл, гарын авлага, зурагт хуудсаар үзэсгэлэн гаргав.

Б. Нарангэрэл