Монгол цусаа цэвэр ариун байлгах, Их эзэн Чингисээрээ омогших, эрмэгших үндэсний ухамсрыг сэргээсэн үндсэрхэг залуучууд Монголд бий болсноос хойш шинэ аравныхаа босгон дээр Хас дор нэгдэн нийлж, нэгдсэн зохион байгуулалтад орохоор болжээ.

“Даяар Монгол”, “Хөх Монгол”, “Даяар хөх Монгол”, “Талын цөөвөр чоно”, “Цагаан хас”, “Хамаг Монгол”, “Бурхантын газар шороо” зэрэг тус тусдаа үйл ажиллагаа явуулж байсан 18 хөдөлгөөний Удирдах зөвлөлийн гишүүд ийм шийдвэрт хүрсэн байна.

Гэхдээ олон мянган хүний дэмжлэгтэй гэгддэг дээрх хөдөлгөөнүүдийг нэгтгэх хурал үргэлжилж буй бөгөөд эхний ээлжинд нэгдэх нь зүйтэй гэдэг дээр санал нийлж, “Монгол үндэстний ХАС нэгдэл” хэмээн нэрийдэхээр тогтжээ. Хурал нам жим, нууц байдалд явагдаж буй. Хас зүүж, үсээ хуссан хэн бүхэн Монголын төлөө гэх үнэн сэтгэлтэй биш хэмээн тэд үзэж байна. Учир нь үндсэрхэг залуусын дунд хятад гаралтай, эрлийз хурлийзууд шургалж, нэр бүхий нэг залуу хамгийн том хөдөлгөөнийг тэргүүлж байсан нь ийнхүү болгоомжлоход хүргэжээ.

УИХ-ын сонгуульд нэр дэвшиж явсан түүнийг болон бусад гишүүнээ “цэвэр монгол” гэдгээ батлахыг шаардаж, “Монгол үндэстний ХАС нэгдэл”-д орох шалгуурыг өндөрсгөж, гишүүдийг хатуу андгай, тангарагтай болгох талаар ярьж буйг эх сурвалж хэлж байна.

Д.Эрдэнэ