Баянзүрх дүүргийн V хороонд баригдаж байсан "АО Жаргалант" компанийн "Happy" хотхоны орон сууцанд захиалга өгсөн иргэд "Хадгаламж" банкнаас урьдчилгаа мөнгөө нэхэмжиллээ.

Тус барилгын урьдчилгаа төлбөрт 2008 оны наймдугаар сард 32 айл 200 гаруй сая төгрөг өгсөн байна. Гэвч өнөөдрийг хүртэл орон сууц ашиглалтад ороогүй байгаа аж. Харин "АО Жаргалант" компани санхүүжилт дутсан шалтгаанаар барилгын ажлаа дуусгаагүй аж. Тиймээс өнгөрсөн зургадугаар сард "Хадгаламж" банк зээлийн хөрөнгөөр санхүүжигдсэн объектыг зээлийн төлбөрт тооцон уг барилгыг өөрийн нэр дээр шилжүүлэн авчээ.

Шилжүүлэн авсан гэрээний 7.1.4-д “Төслийн орон сууцнаас авахаар урьдчилгаа төлбөр төлсөн захиалагчдын гэрээ, түүнд холбогдох баримт бичгүүдийг хүлээн авч шийдвэрлэнэ" гэж заажээ.

Уг заалтыг үндэслэн захиалагч иргэд "Хадгаламж" банкийг энэ сарын 7-ны дотор хохирлоо барагдуулах нэхэмжлэлийг Чингэлтэй дүүргийн шүүхэд гаргаж "АО Жаргалант" компани, "Хадгаламж" банкны хооронд гэрээгээр байгуулсан үүргээ биелүүлэхийг хүссэн байна. Шүүх хурал зарлагдсанаас хойш таван удаа хойшилжээ.

Д.Чанцал http://niigmiintoli.mn/