Их дээд сургуулийн сургалтын төлбөрийг гурав дахин өсгөх тухай маргаантай төлөвлөгөөг эсэргүүцсэн 50 гаруй мянган оюутны жагсаал Лондон хотод болж, Их Британийн эвслийн Засгийн газар анхныхаа томоохон шалгууртаа нүүр тулжээ.

Их Британийн Засгийн газар 2012 оноос эхлэн их сургуулийн сургалтын төлбөрийг гурав дахин нэмэгдүүлж, 9000 паунд буюу 14 400 ам.доллар хүргэхээр төлөвлөж буй тухайгаа албан ёсоор мэдэгдсэн аж. Одоогийн төлбөр нь 3290 паунд буюу 5265 ам.доллар юм байна. Жагсаалыг Их Британийн Үндэсний оюутны холбооноос зохион байгуулж байгаа бөгөөд сургалтын төлбөрийг нэмэхгүй байхыг эрх баригчдаас шаардсан байна. Жагсаал эхэндээ тайван байсан ч сүүлдээ оюутнуудын уур хилэн бадарч, ноцтой болж эхэлжээ. Тэд Парламентын ордны ойролцоохь Консерватив намын байр руу дайрч шил цонхыг нь хагалан, цагдаа, хамгаалалтын ажилтнуудтай сөргөлдсөнөөс гадна зургаан давхар барилга руу нэвтэрч орсныхоо дараа цагдаа нарын дээрээс хүнд эд зүйлс шидэлжээ. Эх сурвалжуудад мэдээлснээр, цагдаа нар 30 гаруй оюутныг баривчлан саатуулаад байгаа аж.

Өмнөд Солонгосын Сөүл хотноо Их 20-ийн уулзалтад оролцож буй Их Британийн Ерөнхий сайд Дэвид Камерон оюутнуудыг зэрлэг балмад, бүдүүлэг авирласан ухамсаргүй хэмээн шүүмжлээд, намын байранд халдаж хохирол учруулсан хүмүүст зохих шийтгэлийг нь хүлээлгэнэ гэсэн байна. Тэрээр энэ талаар ярихдаа, “Мэдээж, ард түмэн тайван жагсаал цуглаан хийх эрхтэй. Гэхдээ эд хөрөнгө эвдэж сүйтгэн, бүдүүлэг балмад авирлах нь байж боломгүй явдал. Бид буруутай этгээдүүдэд шийтгэл оногдуулж, Лондоны гудамжинд дахин ийм бүдүүлэг явдал гаргахгүй байх тал дээр бүхий л арга хэмжээг авна” гэсэн байна. Үймээний үеэр 14 хүн бэртэж гэмтсэний тал нь цагдаагийн ажилтнууд байжээ.

Б.Тамир