Дөнгөж сая "Монгол ньюс" мэдээллийн төвд "Мон-Уран" компанийн захирал Б.Наранхүүгийн өмгөөлөгч н.Билэгсайхан хэвлэлийн хурал хийлгэлээ. Тэрбээр өнөөдөр хэвлэлээр гарсан  "“Мон-Уран”-ы Б.Наранхүү  өсвөр насны охидыг садар самуунд уруу татсан хэргээр шалгагдаж эхэллээ" мэдээлэлд няцаалт хийлээ.



Б.Наранхүүгийн өмгөөлөгч ярихдаа ""Зууны мэдээ" сонин “Мон-Уран”-ы Б.Наранхүүгийн тухай сөрөг мэдээлэл удаа дараа гаргаж байна. Бид өмнө нь дуугүй өнгөрсөн ч энэ удаагийн мэдээлэл хэрээс хэтэрсэн тул хэвлэлийн бага хурал зарлан ташаа мэдээлэлд няцаалт хийж байна.

Ингэхдээ бид "“Мон-Уран”-ы Б.Наранхүү  өсвөр насны охидыг садар самуунд уруу татсан хэргээр шалгагдаж эхэллээ" мэдээлэлд дурьдсанчлан Сүхбаатар дүүргийн Цагдаагийн газар, Улсын Мөрдөн байцаах газарт өнөөдөр үнэхээр ийм хэрэг шалгагдаж буй эсэхээр тодруулга авсан юм.  Үүний хариуд Улсын мөрдөн байцаах газраас "Б.Наранхүүтэй холбоотой хэрэг үүсээгүй", харин Сүхбаатар дүүргийн цагдаагийн газраас "манайд ийм хэрэг шалгагдаагүй" зэрэг хариу өгсөн" гэлээ.

Дээрх хоёр албан тоотыг үндэслэн өнөөдөр ийнхүү Б.Наранхүүгийн өмгөөлөгч мэдэгдэл хийлээ. Тэрбээр үргэлжлүүлэн ярихдаа "бид "Зууны мэдээ" сониныг маргааш шүүхэд өгөх болно. Ингэхдээ бид хувь хүний нэр хүндэд ноцтой халдсан гэж үзээд гурван тэрбум төгрөг нэхэмжлэхээр болоод байгаа" гээд "бидний олж сонссоноор хуулийн байгууллагат дээрх мэдээлэлд дурьдсан хэрэг өөр Наранхүү гэж хүнд шалгагдаж байгаа гэж дуулсан. Гэхдээ хувь хүний болон мөрдөн байцаалтын нууц учир бид энэ өөр Наранхүүгийн талаарх мэдээллийг мэдэх боломжгүй юм" гэв.

Харин бид энэ талаар "Зууны мэдээ" сонины холбогдох хүмүүсээс лавлахад "бидний бичсэн зүйл баримт нотолгоотой. Бид энэ талаар хариу мэдэгдэл хийх болно" гэсэн юм.

Ч.Туяа