“Тусгай салаа”-ны Дэндэвийн дуу буюу “Ааваа зорино” дуу хүмүүст хүрээд багагүй хугацаа өнгөрчээ. Энгийн боловч сэтгэлд дотно энэхүү дууны талаар МҮОНТ-ийн бүтээл “Тусгай салаа” олон ангит киноны байлдагч Дэндэвийн дүрийг бүтээсэн жүжигчин Т.Эрдэнэбаяртай ярилцсан юм.

-Дэндэвийн дууны клип хийгдэж байгаа гэсэн. Клипээрээ юу өгүүлэх бол?
-Тийм ээ, дэмжиж тусалдаг ах нарынхаа ачаар клип хийсэн. Дараагийн долоо хоног гэхэд телевизүүдээр цацагдах байх. Дуу маань төрсөн нутгаа санагалзсан утгатай болохоор клип мөн тийм утгатай.

-“Тусгай салаа” кинонд Дэндэвийн аавын дүрийг бүтээсэн хүн клипэнд тоглосон уу?
-Тоглосон. Ямар уран бүтээл болсныг хүмүүс удахгүй харах байх.

-“Ааваа зорино” дуу хэзээний уран бүтээл вэ?
-Би хоёр жилийн өмнө гаргачихсан байсан. Тухайн үед миний хичээл зүтгэл бага байсан уу, хүмүүст хүрээгүй юм. Харин энэ удаад хүмүүсийн хүртээл болж буйд баяртай байна.

-Урын сандаа хэчнээн дуутай болсон бэ?
-“Ааваа зорино” миний анхны дууны уран бүтээл. Ер нь дуу зохиох санаа байдаг.

-Өөр ямар уран бүтээл дээр ажиллаж байгаа вэ?
-Би МҮОНТ-ийн уран бүтээлийн тавдугаар нэгдэл буюу кино программын албанд дуу оруулагчаар ажилладаг. Одоохондоо киноны санал ирээгүй ч цаашид уран бүтээлийн ажлаа идэвхтэй хийх төлөвлөгөөтэй байгаа.

-“Өнгөт инээд” хамтлагийнхантай хамтарч кинонд тоглосон гэсэн үү?
-“Тусгай салаа” киноны зураг авалт дууссаны дараа “Өнгөт инээд” хамтлагийн “Сая долларын олз” кинонд цагдаагийн дэслэгчийн дүрд тоглосон. Одоогоор зураг авалт дуусч, эвлүүлгээс эхлээд жижиг сажиг ажил үлдсэн байх. Хэзээ бэлэн болж үзэгчдэд хүрэхийг “Өнгөт инээд” хамтлагийнхан мэдэж байгаа.

-Яагаад цэрэг, цагдаагийн дүрд тоглоод байна?
-Надад л тэгж таараад байгаа хэрэг. Түүнээс би дандаа цэрэг, цагдаагийн дүр бүтээхгүй шүү дээ. Цагдаагийн дүрээ Дэндэвийн дүрээс өөр болгох гэж ондоогоор харж, сэтгэсэн гэж бодож байгаа. Цагдаагийн ахлагч хүн ямар байх ёстой, гэмт хэрэг гарсан үед юу хийх гээд ажлын чадвар, сэтгэлзүйг гаргах гэж хичээсэн.

М.Хангал