Нийслэлийг мах, махан бүтээгдэхүүнээр хангахад гол үүрэг гүйцэтгэж буй захуудын нэг болох "Хүчит шонхор" захыг дуудлага худалдаанд оруулж Хятад улсын компани худалдаж авсан гэх мэдээлэл гарсан. Мөн үүнээс өмнө тус захад лангуу түрээсэлдэг иргэд хэвлэлийнхэнд хандаж "Хүчит шонхор" захын удирдлагууд хууль ёсны дагуу үйл ажиллагаа явуулахгүй байгаа талаар ч гомдолж байсан. Энэ талаар "Хүчит шонхор" захын гүйцэтгэх захирал Н.Тогтмолоос тодруулсан юм.

"Хүчит шонхор" захыг дуудлага худалдаанд оруулж, Хятадын компанид зарсан гэх юм. Энэ үнэн үү?
-Харин тийм мэдээлэл гарсан гэж дууллаа. Нүдээр үзээгүй болохоор итгэхгүй байна. Би захаа юу гэж худалдах вэ дээ. Энэ бол ташаа мэдээлэл.

-Танай захыг Япон, Хятад зэрэг улсаас худалдаж авах санал хэд хэдэн удаа ирж байсан гэж дуулсан юм байна?
-Нийслэлчүүдийг мах, махан бүтээгдэхүүний нэлээд хувийг нь манай зах хангадаг. Тиймээс энэ зах зээлийг гадны компаниуд сонирхох нь бий. Гэхдээ "Хүчит шонхор" зах хэвийн үйл ажиллагаа явуулж байгаа бөгөөд хэн ч худалдаж аваагүй. Дуудлага худалдаанд ч оруулаагүй гэдгийг хэлмээр байна. Ийм мэдээлэл энэ жил ч гараад байгаа юм биш. Өнгөрсөн жилүүдэд "Хүчит шонхор"-ыг ногооны зах болгох гэж байгаа. Гадны хөрөнгө оруулалтай компани худалдаж авсан" гэх мэдээлэл хөдөө орон нутаг болон Баянзүрхийн товчоо, Эмээлтийн түүхий эдийн зах зэрэг газраар зориуд тараасан байдаг. Тэглээ гээд манай захын уйл ажиллагаанд өөрчлөлт орж байгаагүй.

-Танай зах өдөрт хэчнээн хэмжээний мах борлуулдаг вэ?
-50-60 тонн мах зарагддаг. Энэ борлуулалтыг явуулахын тулд манай компанийн 1000 ажилчин үйлчилгээ явуулж байна.

-"Хүчит шонхор" захын удирдлагууд хууль ёсны дагуу уйл ажиллагаа явуулахгүй байгаа учраас лангуу түрээслэгчид эсэргүүцэл зарлаж, "Дэнжийн мянга”-ын зах руу нүүж байгаа гэсэн. Энэ асуудал юу болсон бэ?
-Манай зах одоо хэвийн л үйл ажиллагаа явуулж байгаа. Энд нэг юм хэлэхэд хүмүүс эрх гэж ярьдаг болохоос биш үүргээ мартжээ.

Г.Сийлэгмаа