Дөрвөн машин бүхий 24 иргэнийг Сэлэнгэ аймагт түргэвчилсэн оношлуураар шинжилгээнд хамруулж, Орхон аймагт шилжүүлэн 14 хоногийн гэрийн тусгаарлалтад шилжүүлсэн гэж Орхон аймгийн Онцгой комиссоос мэдээллээ.

Сэлэнгэ аймгийн Бугант суманд самарт яваад хөл хорионд ороод байсан Орхон аймгийн иргэдийг ийнхүү урьд шөнө татан авчээ.

УОК-ийн шийдвэр гарвал Улаанбаатар хотоос тус аймагт очих хүсэлтээ гаргасан 3055 иргэнээ татаж авах бэлтгэлээ хангаж байна. Орхон аймгаас Улаанбаатар хот болон бусад аймаг руу зорчих хүсэлтэй 1758 иргэн байгаа бөгөөд тэдгээр иргэн бүгд шинжилгээнд хамрагдах ёстой юм. Гарах хүсэлтэй иргэдийг эрүүл мэнд, ар гэр болон орон байрны гачигдал, ажлын байрны шалтгаан, оюутан гэсэн дарааллаар эрэмбэлж  шинжилгээнд хамруулах бэлтгэл ажлыг хангаж байна гэж тус аймгийн засаг дарга С.Батжаргал хэллээ.