Энэ үгийг хотын болон Замын цагдаагийн удирдлагаас асуумаар байна. Хотын төвд буюу нийслэлийн тавдугаар сургуулийг тойроод дөрвөн талаар нь автомашины зам бий. Ялангуяа сургуулийн урдах зам нарийхнаас гадна явган хүн явах аргагүй.

Автомашинтай урд хойноо оролцоод явцгаана. Та бүхэн явж үзсэн бол автомашины замд тулгаад Солонгос хоолны "Унганэ" болон “Тошлой” хэмээх хоолны газар байрласныг анзаарах биз. Хоолны газруудын барилга авто замтай шууд нийлсэн байгаа.

Та бүхэн хашаа, ТҮЦ зэрэг арга хэмжээ авч явган хүний болон автомашины таглагдсан замыг нээж байгаа нь таашаалтай. Гэсэн хэдий ч энэ мэт хоолны газрын хаагуур өнгөрөөд байсан юм болоо. Хоолны газар ашиг орлогоо бодоод барилга саваа барьсан нь ойлгомжтой. Гэтэл үүнээс цаана хүүхдийн эрүүл мэнд, амь насанд аюул заналхийлж буйг та бүхэн харахгүй байна гэж үү. Хичээл номоо тарсан багачуул гэртээ харихаар энэ замаар гарцгаадаг.

Энэ үеэр та бүхэн хэрэг болгож уг зам ямар ачаалалтай байгааг нэг ирж үзээрэй. Хэд гурваараа машины урдуур гүйх хүүхэд хаазаа нэмэн дуут дохиогоо хангинуулах жолооч гээд юм юм харах вий. Гарц тэмдэглэгээ ч дүүрч гэхэд энэ сургуулийн урд хойгуур өнгөрөх замд нэг ч хурд сааруулагч алга. Дээр нь хоолны газар замтай нийлчихсэн. Авто осол болохгүй гэх баталгаа үгүй. Та бүхэнд сургуулийн удирдлага, эцэг эхчүүдээс энэ талаар жил бүр санал хүсэлт тавьдаг ч өнөөг хүртэл таг чиг.

Шийдсэн шийдвэрлэсэн зүйл алга. Нэг хоолны газрын ашиг бидний ирээдүй болсон үр хүүхдийн маань эрүүл мэнд, амь наснаас үнэтэй байна гэж баймааргүй юм. Эсвэл та бүхэн энэ хоолны газрын байнгын үйлчлүүлэгч юм уу. Үгүй бол та бүхэн хоолны газрын далд эзэд үү.

Б.Дөлгөөн http://www.niigmiintoli.mn/