АНУ, БНЧУ, БНЭУ, БНКУ, Австрали, Канад, Их Британи, Япон улсаас Монгол Улсад суугаа Элчин сайд нар Цагаан сарын баярын талаарх сэтгэгдлээ хуваалцан, мэндчилгээ дэвшүүллээ. Зарим элчин сайд Сар шинийн баярыг гурван ч удаа үзсэн байхад зарим нь хөл хорионы хязгаарлалтын улмаас энэхүү баярыг хараахан үзэж амжаагүй ч Цагаан сарын ёс заншил, соёлын талаарх өөрсдийн сэтгэгдлээ хуваалцахын сацуу Монголын нийт ард түмэнд мэндчилгээ дэвшүүлснийг хүргэж байна. 

"НИЙТ МОНГОЛЧУУДАД АЙСУЙ ҮХЭР ЖИЛДЭЭ ЭРҮҮЛ ЭНХ, АЗ ЖАРГАЛ, БАЯР ХӨӨРӨӨР ДҮҮРЭН БАЙХЫГ ЕРӨӨЕ"

Америкийн Нэгдсэн Улсын Элчин сайд Майкл Клечески:

- Та Монголд амьдрах хугацаандаа Цагаан сар тэмдэглэж байв уу? 
- Өнгөрсөн жил цар тахлын улмаас Цагаан сар тэмдэглээгүй, харин уржнан жилийн Цагаан сарын үеэр эхнэр бид хоёр Вашингтонд байсан бөгөөд Улаанбаатар луу ирэх бэлтгэлээ хангаж байв. Гэхдээ Вашингтонд бид Сар шинийн баярыг тэмдэглэсэн юм байна шүү. Учир нь Монгол Улсын Элчин сайдын яам Конгрессын ордонд гайхалтай хүлээн авалт зохион байгуулсан юм. Монгол судлалын тэргүүлэх олон мэргэжилтнүүд болоод Монголын анд нөхөд, фэнүүд Конгрессын гоёмсог танхимд өлзийт тохиолоор хуран цуглаж, хоёр орны иргэд уулзаж учирсан сайхан баяр болж билээ. Элойса бид хоёрын хувьд тэр баяр биднийг Цагаан сар төдийгүй Монгол Улстай тодорхой хэмжээгээр танилцуулсан үйл явдал болсон.

- Танд энэ баярын юу нь хамгийн их таалагддаг вэ? 
- Монгол орны тухайд Элойса бид хоёрт гайхалтай санагддаг олон зүйлсийн нэг бол Монголчууд уламжлал, зан заншил болоод гэр бүлээ дээдэлж, чухалчилдаг явдал юм. Үүнээс болоод ч тэр үү Монголчууд Цагаан сарын баяраа маш тод томруун, гоёор тэмдэглэдэг. Сонирхуулахад, миний төрөлх хот Нью Йоркт амьдардаг багш найз маань саяхан над руу бичиж, оюутнууддаа Монголын Цагаан сарын талаар хичээл заах гэж байгаагаа хэлээд надаас тусламж хүслээ. Би түрүүнд дурдсан хоёр онцлох зүйл болох гэр бүл, уламжлалын тухай бичээд, Монгол орны гоо үзэсгэлэнг оюутнууд нь олж харна гэдэгт итгэн хэдэн гэрэл зураг илгээсэн.   

- Та манай уншигчдад Цагаан сарын мэнд дэвшүүлнэ үү. 
-Айсуй Үхэр жилдээ эрүүл энх, аз жаргал, баяр хөөрөөр дүүрэн байхын ерөөлийг энэ Сар шинийн баяраар өргөн дэвшүүлье. Цар тахалтай тэмцэж буй энэ цаг үедээ тохируулан баяраа арай өөрөөр тэмдэглэж байгаа ч бүх монголчууд энэхүү баяр ёслолын дээд утга учир болох уламжлал, зан заншил, гэр бүлээсээ сэтгэлийн таашаал хүртэн баярлана гэдэгт эхнэр Элойса бид хоёр итгэж байна.  

"ЭНЭ ЖИЛ ӨРГӨН ХҮРЭЭНД БАЯРЛАХ БОЛОМЖГҮЙ Ч ЁСЛОЛ ТӨГӨЛДӨР ТЭМДЭГЛЭХ САЙХАН ЦАГ ИРНЭ ХЭМЭЭН НАЙДАЖ БАЙНА"

Австрали Улсын Элчин сайд Дэйв Воусэн:

- Та Монголд байх хугацаандаа Цагаан сар тэмдэглэж байсан уу? 
- Би энэ жил Цагаан сарын баярыг гурав дахь удаагаа үзэх гэж байна. 2019 онд Цагаан сарын баярыг анх удаа тэмдэглэсэн нь миний хувьд энд байх үеийн онцлох үйл явдал болсон. Монголчууд Цагаан сарын баярыг хэрхэн тэмдэглэдгийг цар тахал болохоос өмнө танилцсан нь завшаантай.

Хамгийн их анхаарал татсан зүйл бол гэр бүлд төвлөрсөн ёс заншил байлаа. Энэ нь монголчуудын хувьд гэр бүл бат бөх, элэг бүтэн буйгаа тэмдэглэж, ахмад настнуудаа эртнээс хүндэтгэж ирсэн үлгэр жишээ баяр юм.

Монголчууд Цагаан сарын баярыг хоёр дахь жилдээ өргөн хүрээнд тэмдэглэх боломжгүй байгаа ч ёслол төгөлдөр тэмдэглэх сайхан цаг ирнэ хэмээн найдаж байна.

- Та Цагаан сараар ямар айлд зочилсон бэ?
- Би найзуудынхаа аав, ээжийнд зочилж Цагаан сарын баяртай биечлэн танилцсан. Тэд биднийг маш найрсаг, зочломтгой хүлээж авсан нь энэхүү баярын талаарх сэтгэгдлийг минь улам гайхалтай болгож билээ.

Надад бүх зүйл шинэ байсан тул баяртай холбогдолтой ёс заншилтай танилцаж, идээ ундаа зооглох нь надад маш сайхан санагдсан. Тэр дундаа баярын ширээ үнэхээр гайхалтай байсан бөгөөд түүнийг бэлтгэх арга барил, илэрхийлж буй санааг мэдэх нь сайхан байсан. Гэр бүлийнхэн, ах дүү нартайгаа золгохдоо гараа насны эрэмбээр хэрхэн байрлуулах, хадаг барих бэлгэдэл зэрэг уламжлалт зан үйлийг сурч мэдсэндээ таатай байв. Би тэдгээрийг зөв сурсан гэж найдаж байна.

Хэн нэгнийг тайван амгалан, сайн байгаа эсэхийг эрэхээр “Амар байна уу?” хэмээн мэндчилдэг нь надад маш их таалагдсан.

- Энэхүү баярын хамгийн их таалагдсан зүйл юу вэ?
- Монгол хүмүүсийн өмссөн сүр жавхлант, гоёмсог дээл хувцас үргэлж сонирхлыг минь татдаг байв. Өвөг дээдсээс уламжлагдан ирсэн ёс заншлыг үргэлжлүүлэх нь чухал бөгөөд хүн бүр энэхүү агуу уламжлалдаа ямар их үнэтэй хувь нэмэр оруулж хийж буйг харах нь надад сэтгэгдэл төрүүлсэн.

Сонирхуулахад, монгол үндэсний хувцас болон манай хөдөө аж ахуйн хэв маяг хоорондын зохицол байгааг би олж хараад баярласан. Учир нь албан ёслолын үйл ажиллагаанд морин дээр дээлтэй явж болохоор санагдсан.

- Та манай уншигчдад Сар шинийн мэндчилгээ дэвшүүлнэ үү?
- Нийт монголчуудад Сар шинийн мэнд хүргэе. Ирж буй жил та бүхэнд хөгжин цэцэглэлт, эрүүл энхийг авчрах болтугай. Бид дэлхий нийтээрээ цар тахлыг хамтдаа даван туулж, найз нөхөд, гэр бүлийнхэнтэйгээ цугларч уламжлалт баяруудаа ёс заншлынхаа дагуу тэмдэглэх сайхан цаг ирэхийг тэсэн ядан хүлээж байна.

"ЦАГААН САРЫН БАЯРЫГ ГУРВАН Ч УДАА ТЭМДЭГЛЭХ ЗАВШААН ОЛДСОН НЬ ҮНЭХЭЭР ОЛЗУУРХУУШТАЙ"

Бүгд Найрамдах Чех Улсын Элчин сайд Ийржи Бродский:

- Та Монголд байх хугацаандаа Цагаан сар тэмдэглэж байсан уу?
- Миний эхнэр Хана бид хоёр 2017 оны есдүгээр сард Монголд ирсэн тул гурван ч удаа Цагаан сарын баярыг монгол найзуудтайгаа тэмдэглэх завшаан олдсон нь үнэхээр их олзуурхууштай.

- Хамгийн сүүлд Цагаан сараар ямар айлд зочилсон бэ?
-Элчин сайдынхаа хувьд 2019 онд  Монгол Улсын Ерөнхийлөгч Төрийн ордны ёслолын гэрт уригдан, дипломат төлөөлөгчдийн хамт Цагаан сарын баярыг ёслол төгөлдөр тэмдэглэсэн нь хамгийн мартагдашгүй нь байлаа.

Бид анхны Цагаан сарын баяраа Төрийн соёрхолт Д.Сосорбарамынд тэмдэглэж байсан. Тэрхүү үдшийн турш хөөмийчид, морин хуурчид, гитарчид, жүжигчид, хошин шогийн жүжигчид гээд олон чадварлаг уран бүтээлчид ирж гайхалтай үзүүлбэрүүдийг толилуулсан нь маш өвөрмөц санагдаж билээ. Бид яг л гэр бүлийнхэнтэйгээ хамт байгаа юм мэт цагийг маш хөгжилтэй, сайхан өнгөрөөсөн.

Мөн 2019 онд бид Төв аймгийн Эрдэнэ хотын Мэргэжлийн сургалт үйлдвэрлэлийн төвийн захирал Ш.Отгонхүүгийн гэр бүлийн Цагаан сарын баярт уригдаж Ш.Отгонхүү болон түүний гэргий н.Шинээ, хүүхдүүдийнх нь хамт гайхалтай тэмдэглэж билээ. Бид хамтдаа гитар тоглож, дуулж хуурдан, амттай буузаар дайлуулахаас гадна нутгийн малчин айлд зочилж, энэхүү баярыг тэмдэглэж байсан.

- Таны хувьд энэхүү баярын хамгийн их таалагддаг зүйл юу вэ?
- Энэхүү баяр нь мэдээж гэр бүл, хамаатан садан, найз нөхөд гээд таны амьдралд хамгийн чухал, ойр дотны хүмүүстэйгээ уулзах боломжийг олгодгоороо сайхан. Ахмад настнуудаа дээдлэн хүндэтгэх ёс, сар шинийн ерөөлт мэндчилгээ, үндэсний монгол хувцас, байгаль дэлхийгээ хүндэтгэх ёс заншил хийгээд хавар цаг айлчлан ирж буйг бэлгэдэх Цагаан сарын баярын бүхий л уламжлалыг би хүндэтгэн биширдэг.

- Та манай уншигчдад Сар шинийн мэндчилгээ дэвшүүлнэ үү?
- Монголын нийт ард түмэн ирж буй Цагаагчин үхэр жилдээ эрүүл энх, аз жаргалтай байхыг хүсэн ерөөе. Энэ жилийн ихэнх баяр ёслолын уур амьсгалд Ковидын хязгаарлалт нөлөөлж байгаа чех шар айргийг амтлах боломжтой байгаа нь сайхан.

“АНХНЫ ЦАГААН САРЫН БАЯРАА 30 ГАРУЙ ЖИЛИЙН ӨМНӨ ТӨВ АЙМГИЙН АЛДАРТ УЯАЧИЙНД ТЭМДЭГЛЭЖ БАЙЛАА”

Япон Улсын Элчин сайд Кобаяаши Хироюки:

- Та Монголд байх хугацаандаа Цагаан сар тэмдэглэж байсан уу?
-Миний бие анх 1985-1989 онд Монголд томилогдон ажиллаж түүний дараагаар 2005-2008 онд, мөн гурав дахиа буюу энэ удаа 2019 оны 12-р сараас эхлэн өнөөдрийг хүртэл ажиллаж байна. Энэ жилүүдэд Цагаан сарыг тэмдэглэн өнгөрүүлж байсан сайхан дурсамжууд олон бий. Найз нөхөд, танилуудынхаа гэрт зочилж, гараар хийсэн бууз идэх дуртай. 

- Та Цагаан сараар ямар айлд зочилсон бэ? Тэр дурсамжаасаа хуваалцаач?
Анхны Цагаан сарыг 30 гаруй жилийн өмнө Төв аймгийн Сэргэлэн сумын алдарт уяачийн гэрт Элчин сайдын яамны даргынхаа хамтаар уригдан очиж тэмдэглэн өнгөрүүлж байлаа. 

Мөн Монголд хоёр дахь удаагаа томилогдон ажиллаж байх үедээ шүлэгч, зохиолч Ганбат найзтайгаа төрсөн нутаг нь болох Сэлэнгэ аймгаар аялж, Сант сум, Жавхлант суманд Цагаан сар тэмдэглэснээ эргэн санаж байна. Тэр үед оройн зоогт урьсан сумын засаг дарга “Цагаан архи, шимийн архи хоёрыг хольж ууж болохгүй” гэх хэрэгтэй зөвлөгөө өгсөн ч түүнийг мартаад хэцүүхэн зүйлтэй тулгарснаа мартдаггүй юм. 

- Энэхүү баярын хамгийн их таалагддаг зүйл юу вэ?
- Монголын Цагаан сартай адилаар Японы Цагаан сараар бид гэр бүлээрээ цугларч, шинэ оныг тэмдэглэдэг. 
Монголын Цагаан сар бол Япон дахь гэрийнхнээсээ хол байдаг бидний хувьд гэр бүлийн халуун дулаан уур амьсгал, харилцаа хэрхэн чухал болохыг мэдрүүлэх, гайхалтай баяр хэмээн боддог.

- Та манай уншигчдад Сар шинийн мэндчилгээ дэвшүүлнэ үү?
- Бид коронавирусийн цар тахалтай хэцүүхэн цаг үед тулгараад байгаа энэ цаг үед ч Япон, Монголын найрамдалт харилцаа тууштай гүнзгийрч байгаад чин сэтгэлээсээ баяртай байна. Монголын Цагаан сар нь хатуу өвлийг даван туулж, урин хавар айсуйг бэлгэддэг баяр билээ. Коронавирусийн  цар тахал аль болох хурдан намжаасай хэмээн хүсэж байна. Монголчууд та бүхэндээ эрүүл энх, аз жаргалтай, амар тайван амьдрахыг хүсэхийн хамт манай хоёр орны харилцаа улам бүр нягтарч, хөгжин дэвжихийн ерөөлийг өргөн дэвшүүлье. Та бүхэн сар шинэдээ сайхан шинэлээрэй! 

“АХМАД НАСТНУУДАА ХҮНДЭТГЭН ДЭЭДЭЛЖ, ГЭРТЭЭ ХИЙСЭН БУУЗАА ИДЭЖ, ХОНИНЫ УУЦААР ШИРЭЭГЭЭ ЧИМДЭГ НЬ ИХ ТААЛАГДДАГ”

Канад Улсын Элчин сайд Кэтрин Ивкоф:

- Та Монголд байх хугацаандаа Цагаан сарын баярыг тэмдэглэж байсан уу?
- Миний бие 2019 оны 12 дугаар сард Канад Улсаас Монгол Улсад суух Элчин сайдын үүрэгт ажлаа эхлүүлэхээр ирсэн. Канад Улсыг Монгол Улсад төлөөлж, хоёр улсын харилцааг бэхжүүлэхийн төлөө ажиллаж байгаагаараа би маш их бахархдаг. Коронавирусын цар тахал 2020 оны эхээр эхэлж, харамсалтай нь түүнээс үүдэн бид өнгөрсөн жилийн Цагаан сарыг өргөн дэлгэр тэмдэглэх боломжгүй байсан. Харин миний анд нөхөд болон ажлын хамт олон маань Цагаан сарын талаар надад тайлбарлаж, хэрхэн тэмдэглэдэг талаараа ярьж өгсөн.

Өнгөрсөн жилийн Цагаан сарын үеэр цар тахалтай холбоотой хөл хорионы улмаас би ямар ч айлд зочилж чадаагүй. Цагаан сарыг гэр бүлээрээ тэмдэглэдэг уламжлалыг би өөрийн биеэр сонирхон, мэдэхдээ маш их баяртай байх болно.

- Танд энэхүү баярын юу нь хамгийн их таалагддаг вэ?
- Цагаан сарын баярын үеэр гэр бүл төрөл төрөгсөд найз нөхөд гээд өөрийн хувьд эрхэм хүмүүсийнхээ гэрт зочлон, мэндчилдэг нь надад хамгийн их таалагддаг. Энэ үеэр мөн өвөг дээдсийнхээ талаар дурсан санаж, ахмад настнууддаа хүндэтгэл үзүүлж, соёл урлагийн уламжлалаа хүндэтгэн, гэр гэртээ хийсэн буузнуудаа амтархан идэж, мөн хонины ууцаар ширээгээ чимдэг нь их таалагддаг. Хэн нэгэн хүний идэж буй буузнаас нь зоос гарч ирвэл тухайн жилдээ азтай байхыг бэлгэддэг. Цагаан сар бол ирээдүйн сайн сайхныг бэлгэдсэн, аз жаргалаар бялхсан баяр учраас надад таалагддаг.

- Манай уншигчдад Цагаан сарын мэндчилгээ дэвшүүлнэ үү.
- Өнгөрсөн жилд дэлхий дахинд хүн төрөлхтөн онцгой нөхцөл байдалтай тулгарлаа. Цагаан сар бол шинэ бүхний эхлэл учраас би Монголчууддаа хандан Сар шинийн баярын мэндийг хүргэхийн ялдамд эрүүл энх, аз жаргал, хөгжил цэцэглэлтийг ирж буй шинэ онд хүсье.

“ЭНЭ БОЛ ЗӨВХӨН МОНГОЛД Л ХАРЖ БОЛОХ ӨВӨРМӨЦ БАЯР”

Бүгд Найрамдах Энэтхэг Улсын Элчин сайд М.П.Сингх:

- Та Монголд байх хугацаандаа Цагаан сар тэмдэглэж байсан уу?
- Тийм ээ, бид Цагаан сарын баярыг хоёр дахь удаагаа үзэх гэж байгаа ч энэ жил монголчуудын баярын үеэрх найрсаг зочломтгой зан, үндэсний идээ зоог болох буузыг их санах байх. 2021 онд өмнөх шигээ энгийн цаг үе эргэн ирээсэй хэмээн найдан, залбирч байна. Ялангуяа Энэтхэгт үйлдвэрлэсэн, Ковидын эсрэг вакциныг ойрын хугацаанд Монголд авчирна хэмээн бид найдаж байна.

- Хамгийн сүүлд Цагаан сараар ямар айлд зочилсон бэ?
- Бид анхны Цагаан сарын баяраар Гандантэгчинлэн хийдийн Хамба ламаас адис аваад хийдэд Шинийн нэгний номын хурал даган баяссан. Дараа нь өөрсдөдөө захиалан хийлгүүлсэн дээлээ өмсөөд Улаанбаатарт амьдардаг монгол найзынхаа гэрт зочилж, тэдний гэр бүл, найз нөхөдтэй нь хамтдаа энэхүү баярыг тэмдэглэж байлаа. Надад уран чимхэлттэй шинэхэн бууз, өрөмтэй талх маш их таалагдсан. Мөн бид энэ үеэр гэр бүлийн гишүүдийн залуу үе нь хамгийн ахмад настнаасаа эхлэн хүндэтгэн золгох мэндчилгээний өвөрмөц хэлбэр, бие биетэйгээ хөөрөг зөрүүлэн мэндчилэх ёс заншилтай танилцсан. 

- Энэхүү баярын хамгийн их таалагдсан зүйл юу вэ?
- Цагаан сарын баяр нь гэр бүлийг бүхэлд нь хамардаг буюу хөгшин, залуугүй бүх гишүүд нэг дор цуглан мэнд усаа мэдэлцэн харилцаа холбоогоо бэхжүүлэхээс гадна эрт дээр үеэс уламжлагдан ирсэн ёс, зан заншил, түүхэн уламжлалаа хойч залуу үедээ өвлүүлэн үлдээх боломжийг олгодог нь сайхан. 

Бас нэгэн сайхан зүйл нь цагаан, гэгээн бүхэн Цагаан сартай холбоотой байдаг. Миний анзаарснаар ихэнх монголчууд Цагаан сарын баяраараа гэгээлэг өнгийн дээл өмсөж, цагаан морь унаж, цагаан идээгээр хийсэн идээ ундаа идэж, цагаан өнгийн бэлэг солилцдог. Энэ бол зөвхөн Монголд л харж болох өвөрмөц баяр. Би Вьетнамд ажилладаг байхдаа үзсэн тус улсын “Тет” хэмээх Цагаан сарын баярын үеэр ийм өвөрмөц ёс заншлыг хараагүй юм. 

- Та манай уншигчдад Сар шинийн мэндчилгээ дэвшүүлнэ үү?
- Хэдий хүнд хэцүү цагт болж байгаа ч ирж буй Цагаан сарын баяр бид бүгдэд шинэ эрч хүчийг авчирч, Ковидын цаг үе түүх болон ард хоцроосой хэмээн хүсэж байна. Энэхүү Цагаан сар нь бүх хүн төрөлхтөнд шинэ эрч хүч, шинэ итгэл найдвар, шинэ оюун бодлыг авчраасай хэмээн агуу Бурхандаа залбирч байна. Бид бүгдээрээ ирж буй жилдээ илүү аз жаргалтай, эрүүл энх байх болтугай.

“БАЯРЫН ЁС ЗАНШИЛ, ҮНДЭСНИЙ ХУВЦАС, ИДЭЭ УНДЫГ УЛАМЖЛАЛТ БАЙДЛААР НЬ ХАДГАЛАН ӨНӨӨГ ХҮРТЭЛ ТЭМДЭГЛЭСЭЭР БАЙГАА НЬ САЙХАН”

Бүгд Найрамдах Куба Улсын Элчин сайд Раул Делгадо Консепсион:

- Та Монголд байх хугацаандаа Цагаан сар тэмдэглэж байсан уу?
- Бид Монгол улсад өнгөрүүлж буй 4 жилийн хугацаандаа жил бүр Цагаан сарыг тэмдэглэсээр ирсэн. Бидний бодлоор Цагаан сар бол Монголын ард түмний хувьд хамгийн чухал баяр бөгөөд энэ бол эртний түүхтэй баяр, өвөл дуусч хавар эхэлснийг бэлгэддэг баяр билээ. Үүнээс гадна билгийн тооллоор шинэ он эхэлснийг бэлгэддэг билээ.

- Хамгийн сүүлд Цагаан сараар ямар айлд зочилсон бэ?
- Бид жил бүрийн Цагаан сараар манай Элчин сайдын яамтай ойр дотно байдаг найз нөхдийнхөө урилгаар тэдний гэр бүлд зочлон энэхүү баярыг хамтдаа тэмдэглэдэг.  Цар тахал болохоос өмнө, өмнөх жилүүдэд бид Куба улстай холбоотой байдаг зарим компаниудын Цагаан сарын баярт зочлон хэрхэн тэмдэглэдгийг харж байсан. Айл саахалтууд нэг нэгнийдээ зочлон энэхүү баярыг хамтдаа тэмдэглэдэг учир зөвхөн гэр бүлийн баяр төдийгүй Монголын ард түмний гэр бүлийн хэлхээ холбоо, эв нэгдлийг харуулдаг гэж боддог.

- Энэхүү баярын хамгийн их таалагддаг зүйл юу вэ?
- Энэхүү баярын хамгийн дуртай зүйлсийн нэг бол гэр бүлийн шинж чанарыг агуулахаас гадна ахмад хүмүүсээ дээдэлж тэдэнд хүндэтгэл үзүүлдэг явдал юм. Түүнчлэн намайг маш ихээр гайхшруулдаг зүйл бол уламжлалт монгол ахуй, соёлыг мэдрүүлдэг энэхүү Цагаан сарын баярыг тэр чигээр нь одоог хүртэл хадгалж ирсэн явдал юм. Энэхүү баяртай холбогддог ёс заншил, соёл, хувцас болон үндэсний хоол унд зэргийг уламжлалт байдлаар нь хадгалан өнөөг хүртэл тэмдэглэсээр байгаа нь надад маш их таалагддаг. 

- Та манай уншигчдад Сар шинийн мэндчилгээ дэвшүүлнэ үү?
- Кубын ард түмний нэрийн өмнөөс ирж буй Үхэр жилийн мэндийг Монголын бүх өрх гэр бүл болон ард түмэнд хүргэн хөгжил цэцэглэлт, амжилт, сайн сайхныг хүсэн ерөөе. Монголын бүх ард түмэн Улсын Онцгой Комиссынхоо заавар зөвлөгөөг даган эрүүл мэндээ хайрлан хамгаалж, цар тахлын тархалтаас урьдчилан сэргийлж, ялангуяа Цагаан сарын баярын үеэр өндөр настнуудаа халамжлан энэхүү халдварын тархалтаас урьдчилан сэргийлэхийг хүсье. Мөн бид Монгол Улсын Засгийн газар, төрийн байгууллагууд болон Монголын бүх ард түмэнд Сар шинийн мэнд хүргэхийн зэрэгцээ ирж буй Үхэр жилдээ Монголын бүх ард түмэн эдийн засаг болон эрүүл мэндийн хувьд дэвшилттэй жил байхыг хүсэн ерөөе. Маш их баярлалаа.

“ҮХЭР ЖИЛДЭЭ БҮГДЭЭРЭЭ ЭРҮҮЛ ЭНХ, АЗ ЖАРГАЛТАЙ БАЙЖ АМЖИЛТ БҮТЭЭЛ, ХӨГЖИЛ ЦЭЦЭГЛЭЛТЭЭР ДҮҮРЭН БАЙХЫГ ЕРӨӨЕ”

Их Британи Улсын Элчин Сайд Филип Малон:

- Та Монголд байх хугацаандаа Цагаан сарын баярыг тэмдэглэж байсан уу?
- Тийм ээ, Монголд Цагаан сарын баярыг тэмдэглэх завшаан тохиолдсон. Энэ удаад би Монголд Цагаан сарын баярыг гурав дахь жилдээ тэмдэглэх гэж байна. Анхны Цагаан сар буюу 2019 онд л уламжлалт байдлаар тэмдэглэсэн ч 2020, 2021 онуудад коронавирусийн улмаас өргөн хүрээнд тэмдэглэх боломжгүй байна.

- Та Цагаан сараар ямар айлд зочилсон бэ?

- Би найз нөхдийн болоод ажил, мэргэжлийн харилцаа холбоотой хүмүүсийндээ зочилж энэ баярыг тэмдэглэх завшаан олдсонд тун баяртай байдаг.

- Энэхүү баярын хамгийн их таалагддаг зүйл юу вэ?
- Энэ баярыг гэр бүлээрээ цуглан тэмдэглэдэг нь хамгийн сайхан. Би Азийн бусад орнуудад цагаан сарыг тэмдэглэж байсны хувьд Монголд хэрхэн тэмдэглэдгийг харах сонирхолтой байсан. Би үхэр жилтэй бөгөөд миний жил гарч байгаад тун баяртай байгаа.

- Та манай уншигчдад Сар шинийн мэндчилгээ дэвшүүлнэ үү?
- Танай сайтын уншигчдад ирж буй Цагаагчин үхэр жилдээ эрүүл энх, аз жаргалтай байж амжилт бүтээл, хөгжил цэцэглэлтээр дүүрэн байхын ерөөлийг өргөн дэвшүүлье.

Та бүхэн Элчин сайд нарын дэлгэрэнгүй ярилцлагыг хүлээн авах бол ЭНД дарна уу.