Нийслэлийн Засаг дарга бөгөөд Улаанбаатар хотын Захирагч С.Амарсайхан /2019.09.08/ сайжруулсан шахмал түлшний үйлдвэрлэл, түгээлт, борлуулалт, тээвэрлэлт, нөөцлөлтийн явцыг шалгажээ. Тэрээр "Таван толгой түлш" ХХК-ийн үйлдвэрлэлийн нөхцөл байдлыг шалгасан байна.

“Өнөөдрийн байдлаар 361 борлуулагчтай сайжруулсан шахмал түлш борлуулахаар гэрээ байгуулсан. 165 мянган тонн шахмал түлш нөөцөлсөн. Жижиглэнгийн цэгүүдэд 21 мянган тонн түлшийг нөөцөлсөн. Одоогийн байдлаар нийт найман шугамаар өдөрт 2300-2500 тонн шахмал түлшний үйлдвэрлэл явуулж байна.

Энэ сард багтааж нэмэлт хоёр шугам ашиглалтад оруулснаар өдөрт 2900 тонн шахмал түлш үйлдвэрлэх төлөвлөгөөтэй. Батлагдсан орц, жорын дагуу бүтээгдэхүүн үйлдвэрлэл тасралтгүй, хэвийн явагдаж нөөцлөлтийн ажлыг зохион байгуулж байна” хэмээн “Таван толгой түлш” ХХК-ийн гүйцэтгэх захирал М.Ганбаатар танилцуулав. Мөн өнөөдрийг хүртэл 10 260 тонн шахмал түлш борлуулсан, иргэдээс гомдол ирээгүй гэв.

Уулзалтын үеэр шахмал түлш тээвэрлэх зарим компанийн удирдлагуудтай санал солилцсон юм. Тээвэрлэлт хийх компаниуд тодорхой шалтгаанууд дурдаад шахмал түлш нөөцлөх, зөөх, ачихад асуудалгүй гэдгээ хэлсэн юм.

Гэр хорооллын дунд борлуулалтын цэгийг түлшээр тасралтгүй хангах 40 агуулах, гэрээт 500 гаруй цэгийг өдөр бүр түлшээр хангана. 

Гэр хорооллын дунд борлуулалтын цэгийг түлшээр тасралтгүй хангах 40 агуулах, гэрээт 500 гаруй  цэгийг өдөр бүр түлшээр хангана. Өөрөөр хэлбэл, ХАНГАМЖИЙН БААЗ-ДУНДЫН ХАНГАМЖИЙН ТӨВ-ГЭРЭЭТ БОРЛУУЛАГЧ гэсэн дамжлагаар хэрэглэгчдэд сайжруулсан түлшийг тасралтгүй хүргэх юм байна.

Хэрэглэгчид сайжруулсан шахмал түлшийг худалдан авахдаа “Сайн” нэртэй смарт карт ашиглана. Нэг карт гурван тонн түлш худалдан авах эрхтэй. Иргэд картаа гэрээт борлуулагчийн аппликешнд уншуулж, үндсэн эрхээсээ хасуулан тооцно. Энэ мэтээр хэрэглэх хэмжээ дууссан тохиолдолд “Таван толгой түлш” ХХК-д хандан эрхээ сэргээлгэх боломжтой аж.