"Сүнс" хамтлагийн дуучин Б.Лхагвасүрэнг "Зогс нэг агшин" буландаа урилаа.

-"Сүнс" хамтлагаар сонин юутай вэ?
-Хамтлагаар онц сонин юмгүй. Би "Max Music" гэдэг хувийн дуу бичлэгийн студитэй. Студи дээрээ залуу хамтлаг дуучдын уран бүтээлийг хийж байгаа. Хамгийн гол нь би хуульч хүний хувьд оюуны өмчийн тал дээр түлхүү анхаарч ажиллаж байгаа. Тодорхой хэмжээний ахиц гарч л байна.

-Студийн зүгээс ямар хамтлаг, дуучидтай хамтарч ажиллаж байна?
-Хамгийн сүүлд өнгөрсөн хавар "Outlaw" хамтлагийн тоглолтыг хийсэн. Одоо цомгийн бичлэгийн ажил хийгдэж байгаа. Мөн "Аянга", "Сигнал" зэрэг залуу хамтлагтай хамтарч ажиллаж байна даа.

-Хуучны хамтлагууд ойн тоглолт хийгээд л байна. Танай хамтлагт ой тэмдэглэх бодол байгаа юу?
-Ер нь бол бодож байгаа. Гэхдээ хийхээсээ өмнө нэг их яриад хэрэггүй байх. Цаг нь болохоор бид тоглоно. Ой хийнэ гэвэл бид бараг "Харанга" хамтлагтай чацуу болох гээд байгаа юм. Яагаад гэвэл бид бүжгийн хамтлаг байж байгаад сүүлд нь дуулсан. Тийм болохоор ойгоо тэмдэглэхэд хүмүүс гайхах байх аа.

-Ой тэмдэглэх төлөвлөгөө байгаа юм чинь тодорхой хэмжээнд уран бүтээл хийж байгаа байлгүй?
-Хийж байгаа. Одоо 2, 3 шинэ дуун дээр ажиллаж байна. Хэр зэрэг олонд хүрэхийг хэлж мэдэхгүй нь.

-Хэзээ сонсогчдод хүрэх вэ?
-Энэ улиралдаа багтаад хүрэх байх. Бид тийм төлөвлөгөөтэй уран бүтээлээ хийж л байна.

-Бусад гишүүд юу хийж байна вэ?
-Манай Мөөгий Нийслэлийн бизнес хөгжлийн төвийн аж ахуйн албаны дарга хийж байгаа. Зулаа маань Нийслэлийн хөдөлмөрийн биржид мэргэжилтэн хийж байна. Надаас бусад нь л төрийн албанд ажиллаж байх шив дээ.

Н.Пунцаг