Солонгос болон Японоос ирсэн жуулчид Монголчуудад ихэвчлэн саван бэлэглэдэг. Тэрхүү савангаа "гар аргаар хийсэн хамгийн сайн нь" хэмээн тайлбарладаг. Энэхүү саван нь үнэтэйгээс гадна мода-аа дагаж борлуулалт нь өсдөг гэж байсан. Саван мода-нд ордог гээд сонсохоор нэг л тийм... Тэндхийн охид гар аргаар хийсэн, анхилам үнэртэй саванг илүүтэй худалдан авдаг байна.

Энэ нь арьсыг зөөлрүүлээд зогсохгүй, үнэр нь арьсанд удаа хадгалагддаг гэнэ. тэгэхээр бид ч гэсэн энэ төрлийн бизнесийг хийгээд үзвэл ямар вэ? Өөрийн гэсэн брэнд. Монголоороо овоглох шилдэг бүтээгдэхүүн болох ч юм билүү.

"Бизнесийн мэдээ" сониноос энэ удаад гэрийн нөхцөлд бага хэмжээний саванг хэрхэн хийж болох талаарх мэдээллийг хүргэе. Тэгэхдээ энд хоёр янзын аргыг нийтэлье.

Эхний арга. Танд шаазан аяга буюу паалантай сав хэрэг болно. Учир нь усны уурыг ашиглаж энэхүү савангаа хийх юм. Нуршаад яахав. Дагаад хийгээрэй.

Хатуу саван
70 г өөхөн тосонд 30 г гахайн тос хольж 30 г сод юм уу хужирыг бага багаар цувуулан хийж хутгаад эцэстнь 20-30 г ус хийж 30 минут буцалгаж халаана. Дараа нь 100 мл 20 хувийн хоолны давс хольж саванг өрөмтөн ялгартал халаагаад халбагаар хаман авч самбай буюу шүүрээр шүүж хатаана. Нүүр гарын саванг хийхэд дээрх жор аргаар гарган авч хүйтэн усаар булхасны дараа спирт, охинд уусгасан ургамлын үнэрт болон өнгөт хандмалтай хутгаж өнгө үнэр оруулаад тусгай хэвэнд шахаж янз бүрийн хэвийн саван гаргана. Үнэр, өнгө оруулагчаар орон нутгийн ургамал амьтны гаралтай түүхий эд улиасны нахиа, аньсны шүүс, хад, гүзээлзгэнэ, модны шилмүүс, бамбай, гонидны ханд, хар модны холтос зэргийг ашиглана.

Шингэн саван
100 гр ургамал, амьтны гаралтай тосонд 30 гр идэмхий кали, 40 гр ус хийж сайтар хутгаад угаалганд шууд хэрэглэнэ. Савангийн найрлагад шүлт холихдоо нүүр, нүд рүү үсрэхээс болгоомжилж мөн гарын арьсаа хамгаалах бээлий, шилэн хутгууртай ажиллах шаардлагатай. Нэгэнт савангаа үйлдвэрлэсэн хойно сав баглаа нь ямар байхыг үйлдвэрлэгчийн сонголт л мэдэх нь.