Кубын засгийн газар чөлөөт эдийн засгийн бодлогыг хэрэгжүүлэх гэж байна. Тус улсад сүүлийн 99 жилийн хугацаанд чөлөөт эдийн засгийн тогтолцоо байгаагүй юм. Тиймдээ ч холбогдох албаны хүмүүс одоогийн төвлөрсөн төлөвлөгөөт эдийн засгийн тогтолцоог халахаар төлөвлөж байна.“Газетте” сонины бичсэнээр энэ сарын 27-нд тус улсын удирдагч Рауль Кастро эдийн засаг, бизнесийн чуулга уулзалт зохион байгуулжээ. Тухайн үед тэрбээр бүс нутгийн томоохон бизнесмэнүүдтэй уулзаж, хэрхэн эдийн засгаа дэлхийн улсуудын хэмжээнд хүргэх талаар ярилцсан гэнэ. Тэрбээр “Хэрэв эдийн засгийн тогтолцоог өөрчлөх бол хуулинд өөрчлөлт оруулах шаардлагатай юм. Засгийн газар үүнийг боломжгүй зүйл гэж үзээгүй. Тэгэхээр бид эдийн засгийн шилжилтийн асуудалд дээд хэмжээгээр анхаарлаа хандуулах болно” гэв.

Тус улсын үзэж буйгаар эдийн  засгийг сэргээхэд Канад, Европ, Азийн орнуудын компаниудтай хамгийн түрүүнд хамтран ажиллах боломжтой аж. Учир нь үйл ажиллагаагаа хамгийн амжилттай явуулж буй компаниудыг урьж, эдийн засгийн болон бусад асуудалд зөвлөгөө авах гэнэ. Харин Куба улс задрах уу гэсэн асуултад засгийн газар хатуу байр суурьтай хандаж байна. Тэд эдийн засгийн тогтолцоог өөрчилснөөр Кубын үндэсний бодлого өөрчлөгдөхгүйг анхааруулж байгаа юм. Гэсэн ч зарим улс төр судлаач тус улсын өнөөгийн байдлыг дүгнэхдээ “Куба улс дэлхийн олон улстай хамтран алхах цаг нь болсон. Үүнийг шинэ удирдагч Рауль Кастротой холбон тайлбарлах хэрэгтэй юм. Харин Фидель Кастро эдийн засгийн өөрчлөлтийг хүсч байгаагаа шууд илэрхийлээгүй. Гэсэн ч түүний улс төрийн хандлагаас үзвэл улсаа хөгжүүлэх эрмэлзэлтэй байна” гэв.

Кубын албан ёсны удирдагч Фидель Кастро Венесуэлийн ерөнхийлөгч Уго Чавестай өнгөрөгч сард уулзсан. Тухайн үед Фидель түүнээс эдийн засгийг хэрхэн өөрчилж болох талаар нэлээдгүй зөвлөгөөг авсан аж. Тиймээс дүү Раульдаа энэ тухай мэдэгдэж, улмаар эдийн засгийг өөрчлөх бодлогыг санаачилсан байна. Харин хэзээнээс уг бодлого хэрэгжиж эхлэх нь тодорхойгүй байна. Ямартай ч дээрх бодлогыг ойрын хоёр жилд багтаан хэрэгжүүлэх сурагтай.

Эрх чөлөөний арлын иргэд засгийн газрын бодлогыг санаа нэгтэй хүлээн зөвшөөрч байгаа бололтой. Зарим нэг нь хэрхэн зээл авах талаар судалж байгаа гэнэ. Гавана хотын иргэн Фернандо Хулиас “Хүн бүр бизнес эрхэлж, амьдралаа дээшлүүлэхийг хүсч байна. Тэгэхээр Куба улс өнөөгийн эдийн засгийн тогтолцоогоо хаяахад бэлэн болсон” хэмээжээ.

Д.Түвшинтөр http://www.niigmiintoli.mn/