Нэгэн шинэ нянгийн дуулиан түгшүүр төрүүлээд байгаа ч энэ нь тийм ч аймаар биш гэнэ. Бүх төрлийн антибиотикт тэсвэртэй супер нян гэж нэрлэж буй “NDM 1” нянг үхлийн аюултай хэмээн хэвлэл мэдээллээр мэдээлж байна. Гэвч энэ төрлийн нян нь гурван жилийн өмнө бий болсон бөгөөд одоогийн мэдээлж байгаа шиг аюул таригч өвчин биш гэж нян судлаачид мэдэгджээ.

Ийм төрлийн нянгийн дэгдэлт 2007 оноос эхтэй бөгөөд “NDM 1” нян нь шинэ төрлийн өвчин биш аж. Нян судлаач Марк Толеман хэсэг мэргэжилтнүүдийн хамт гурван жилийн өмнөөс судалжээ. Тэрбээр энэ нянгийн тухай 2009 онд анх хэвлэлээр тайлбар хийж байжээ. Супер нян хүмүүсийн тооцоолж байгаа шиг аюулт өвчин биш гэдгийг Британийн эмийн хяналтын газрын дарга Дэвид Ливерморе мөн батлан мэдэгджээ. "Супер нянгийн халдвар авсан гэх 2008 оны эхний тохиолдол Британид бүртгэгдсэн. Энэ нян 2007 онд Энэтхэгт гарч байсан гэсэн баримт байдаг" гэж Ливерморе хэлжээ.

Одоогоор Британид энэ төрлийн нянгийн халдвар авсан 37 тохиолдол бүртгэгдсэн бол Энэтхэг, Пакистан, Бангладешт 100 гаруй тохиолдол бүртгэгдсэн байна. Нянгийн тархалт Британид ихээхэн идэвхтэй байгаа учир хэвлэлээр энэ талаар түлхүү мэдээлснээр дэлхийн нийтийн анхааралд өртжээ. Супер нянг "Эн Ди Эм-1" нян гэж нэрлэж байгааг Энэтхэгийн эрх баригчид эсэргүүцэж байгаа юм. Энэ нянг Энэтхэгчүүд "Нью Дели металло Бета ластамасе 1" гэж нэрлэсэн бөгөөд Шинэ Делигээс эхтэй гэсэн утгатай үг аж.

Бүх төрлийн антибиотикт тэсвэртэй гэж ярих болсон нь супер нян олны анхааралд өртөхөд гол нөлөө үзүүлжээ. Супер нянгаас авсан дээжид хийсэн шинжилгээгээр тигециклин, колицин гэсэн хоёр антибиотик ихээхэн үр дүнтэй нөлөөлдөг болохыг мэргэжилтнүүд тогтоосон байна. Дэлхийн эрүүл мэндийн байгууллага зэрэг олон улсын байгууллагын удирдлага супер нянгийн дэгдэлт аюулын хор хөнөөлтэй гэдгийг зарлаагүй байгаа билээ. Үүнээс сэргийлэх хамгийн зөв арга бол гараа сайн угаах гэж мэргэжилтнүүд зөвлөж байна.