УИХ-аар Монгол Улсын 2015 оны төсвийн тухай хуулийн дөрөв дэх хэлэлцүүлгийг хийж, хуулийн зүйл заалт бүрээр санал хураалт явуулан баталлаа.

Ирэх онд улсын нэгдсэн төсвийн тэнцвэржүүлсэн зардал 7.6 их наяд, тэнцвэржүүлсэн орлого 7.1 их наяд төгрөг, төсвийн алдагдал 439.2 тэрбум төгрөг байхаар тооцов.

Мөн төсвийн тухай хуультай холбогдон гарч буй Нийгмийн даатгалын сангийн 2014 оны төсвийн тухай, Хүний хөгжил сангийн 2015 оны төсвийн тухай хуулийн төслүүдийг хуулийн хугацаанд нь амжиж хамтатган баталлаа.

УИХ-аар төсвийн төслийг хэлэлцэж байх явцад уг төслийг боловсруулж, өргөн мэдүүлсэн  Засгийн газрын тэргүүнийг огцруулсан. Одоо дөрвөн яам нь сайдгүй, Ерөнхий сайдын албыг үүрэг гүйцэтгэгч хашиж буй улс төрийн онцгой нөхцөл дунд ирэх оны төсөв батлагдав. Анх удаа үүрэг гүйцэтгэгч Засгийн газар ирэх онд захиран зарцуулах төсвийг хүлээн авлаа.

Эрх баригчид Ерөнхий сайдаа томилоогүй, шинэ Засгийн газрын бүрэлдэхүүнд ямар гишүүд багтан ажиллах нь тодорхойгүй нөхцөлд Монгол Улсын нийгэм эдийн засгийн байдлыг тодорхойлох хамгийн чухал хууль батлагдав.
Өнөөгийн байдлаар Ерөнхий сайдын албыг үүрэг гүйцэтгэгч хашиж, Засгийн газрын 13 яамны дөрөв нь сайдгүй байна. Нэгэнт Гүйцтэгэх засаглалын тэргүүн огцорсон тул одоо үүрэг гүйцэтгэж буй хуучин сайд нараас хэн нь үлдэх, ямар сайдууд шинээр томилогдох нь тодорхойгүй болов.
“Эзэн”-гүй яамдад суух сайдууд ирэх онд хэдэн тэрбум төгрөг захиран зарцуулахыг графикаас харна уу.

Төрийн өндөр, дээд албан тушаалтнуудын ирэх онд зарцуулах багцыг ийн батлав.

• Ерөнхийлөгчийн тамгын газрын дарга- 7.6 тэрбум төгрөг
   
• УИХ-ын дарга-27.3 тэрбум төгрөг
   
• Үндсэн хуулийн цэцийн дарга- 722.2 сая төгрөг
   
• Улсын дээд шүүхийн Ерөнхий шүүгч- 3.9  тэрбум төгрөг
   
• Шүүхийн ерөнхий зөвлөлийн дарга- 54.8 тэрбум төгрөг
   
• Хүний эрхийн үндэсний комиссын дарга- 849.5 сая төгрөг  
   
• Улсын ерөнхий прокурор- 20.3 тэрбум төгрөг
   
• ҮАБЗ-ийн Нарийн бичгийн дарга- 2.1 тэрбум төгрөг
   
• МУ-ын ерөнхий аудитор- 8.5 тэрбум төгрөг  
   
• Авлигатай тэмцэх газрын дарга- 9.9 тэрбум төгрөг
   
• Төрийн албаны зөвлөлийн дарга- 630.7 сая төгрөг
   
• Үндэсний статистикийн хорооны дарга- 8.6 тэрбум төгрөг
   
• Сонгуулийн ерөнхий хорооны дарга- 950.2 сая төгрөг
   
• Цагаатгах ажлыг удирдан зохион байгуулах улсын комиссын дарга-683.4 сая төгрөг
   
• Засгийн газрын хэрэг эрхлэх газрын дарга- 22.8 тэрбум төгрөг