Өнөөдөр Өвөрмонголын алдарт зураач Б.Үүрцайхын Бөртэ чоно, Гуа марал олон улсын үзэсгэлэнгийн аян Монголд нээлтээ хийнэ. Зураач Б.Үүрцайх сүүлийн арван жилийн турш Монгол үндэстний шүтээн болсон "Бөртэ чоно, Гуа марал" тусгай сэдэвлэсэн бар зураг, хятад зураг, шуумал баримал зэрэг олон төрлийн бүтээл туурвиж үндэстний амин сүнс, хувь заяаг орчин үед тусгаж олон нийтэд танигдсан уран бүтээлч.

"Бөртэ чоно, Гуа марал" сэдэвт үзэсгэлэнг 2001 оноос эхлэн Хятадын уран зургийн галлерей, Өвөрмонголын уран зургийн галлерей, Герман, Румын, Малайз, Япон зэрэг олон оронд хэд хэдэн удаа гаргаж байсан. Мөн дэлхийн 30 гаруй улс оронд урлаг соёлын солилцоо хийж, Монгол үндэстний соёл урлагийг сурталчлан таниулж байсан. Тэрээр 2003 онд "Бөртэ чоно, Гуа марал" зургаар БНХАУ-ын төрийн хамгийн өндөр шагнал болох "Алтан өнгө" шагналыг хүртэж байсан аж.

Энэхүү үзэсгэлэнд "Бөртэ чоно, Гуа марал", "Онгон торой", "Бөртэ чоно, Амь нас, Арвин дөл" зэрэг энэ жил бүтээсэн бүтээлүүд тавигдаж байгаа ба уран бүтээлчийн Монголын анхны үзэсгэлэн нь юм. Б.Үүрцайхын "Бөртэ чоно, Гуа марал" сэдэвт зураг нь дүрслэх урлагт өөрийн гэсэн өвөрмөц байр суурийг хэдийн олж, бусдаас ялгарах өвөрмөц өнгө аястай болж чадсан гэж олон урлаг судлаачид онцолдог аж.