Нийслэлийн мэргэжлийн хяналтын газраас хөшөө дурсгалыг шалгасан байна. Мэргэжилтнүүд нийслэлийн зургаан дүүрэгт байрлах 117 хөшөө дурсгалыг хамруулан шалгажээ. Шалгалтаар 60 гаруй хөшөө дурсгал эвдэрч сүйдсэн байжээ.

Тухайлбал Баянгол дүүргийн нэгдүгээр хорооны нутагт байрлах "Буурын ноцолдоон" хөшөөний өнгө будаг гандаж халцарсан, гадна талын шавардлага хуурсан байжээ. Мөн Төмөр замын вокзалын хойно байрлах "Найрамдлын ган зам өндөрлөг" хөшөөний соёмбоны зарим хэсэг хуурч унасан, шатны боржин чулуу нь хагарч эвдэрсэн гэх зэрэг олон хөшөө дурсгал засварлах шаардлагатай болсон байжээ.

Заримыг нь засаж сайжруулсан ч хүний нүд хуурсан юм хийдэг байна. Тухайлбал, ардын хувьсгалын 25 жилийн ойн өндөрлөгийг тухайн дүүргийн ЗДТГ-аас хөрөнгө гарган сэргээн засварласан боловч уг ажил нь мэргэжлийн түвшинд хийгдээгүй, хөшөөний суурь, оройн хэсгийг засварлаагүй байжээ.

Мөн Зайсан толгой дахь Зөвлөлтийн дайчдын хөшөөний хамгаалалтын бүсэд хашаа хатгасан байсныг буулгасан аж, Дээрх илэрсэн зөрчил дутагдлуудыг арилгах зорилгоор улсын байцаагчийн албан шаардлагыг дүүргүүдийн Засаг даргын тамгын газарт хүргүүлсэн байна.

Л.Алтанхишиг