"Монгол 999 үндэсний нэгдэл" Тавантолгойн орд ашиглахад зориулж боловсруулсан Засгийн газрын төслийг алдаатай хэмээн шүүмжиллээ. Өчигдөр болсон хэвлэлийн бага хурлын үеэр тус нэгдлийн - төлөөлөгчид ярихдаа хамгийн түрүүнд оператор компанийг сонгох асуудал яригдаж байгааг буруу гэв.

Мөн баялгийн хэмжээгээ эцэслэн тогтоож, Техник, эдийн засгийн үндэслэлээ гараагүй байхад төсөл боловсруулж буйг ч шүүмжиллээ. Гадна, дотны нэр хүндтэй эрдэмтэд Тавантолгойн ордоос олох ашгийн хэмжээг тооцож, 5.4 их наяд ам.доллараас их ашгийг 30 жилийн дотор өгнө гээд байхад тэдний үгийг тоохгүй байгаа нь хачирхалтай хэмээн Засгийн газрыг мөн хардсан юм.

Иймэрхүү олон асуултын хариуг авахын тулд "Монгол 999 үндэсний нэгдэл" ХК-ийн Төлөөлөн удирдах зөвлөлийн гишүүд Ерөнхий сайд С.Батболдтой уулзах хүсэлт тавьжээ.

Мөн Монголын бүх иргэнийг компанийнхаа хувьцаа эзэмшигч болгож, Тавантолгойн ордоос хувь хүртэх боломжийг олгохын тулд холбогдох хуулинд өөрчлөлт оруулах хэрэгтэй байгааг дурьдсан юм.