Зааны ясан эрэг, Бразилийн шигшээ багийн тоглолтын үеэр хоёр дахь гоолыг Луйс Фабиано гарныхаа оролцоотойгоор эсрэг багийнхаа хаалганд хийсэн.

Энэ талаар Аргентины шигшээ багийн дасгалжуулагч Диего Марадона шүүмжлэн ярьсан байна. Тэрбээр "Яах аргагүй бөмбөгөнд түүний гар хүрсэн. Би ч, бусад ч гэрчилнэ" гэжээ.

Ням гарагт болсон тоглолтын дараа Бразилийн тоглогч Л.Фабиано наргиан болгож "Энэ санаандгүй тохиолдол байсан. Бөмбөгөнд хүрсэн нь ариун гар, Бурханы гар" хэмээн ярьсан аж.

Түүхийг сөхвөл өмнө нь 1986 онд Мексикт болсон хөлбөмбөгийн ДАШТ-ий үеэр Аргентины шигшээ багийн тоглогч Марадона шөвгийн наймын тоглолтонд англичуудын хаалганд гараараа бөмбөг оруулсан. Тухайн үед үүнийг анзаараагүй, оноонд тооцсон ч хожим "Бурханы гар хүрсэн гоол" хэмээн нэрлэсэн юм.

Харин энэ удаагийн тохиолдолд Л.Фабиано бөмбөгөнд гар хүрснийг үгүйсгэж, "Бөмбөгөнд миний гар хүрсэн юм шиг харагдсан байх. Гэхдээ миний мөрийг цохисон. Тэгээд ч гайхалтай гоол болж, ямарч эргэлзэхээр зүйл гараагүй шүү дээ. Өөрөөр хэлбэл, мэргэжлийн ур чадвар харуулсан тоглолт байсан. Үүнээс сайхан гоол энэ удаагийн Дэлхийн аваргын үеэр орсон гэж үү" хэмээн ярьжээ.

Гэвч "Бурханы гар"-ын жинхэнэ эзэн Д.Марадона үүнийг үгүйсгэсэн юм. "Би Английн багийн эсрэг тоглолтод гоол оруулж байхдаа шүүгч инээхийг огт хараагүй. Тухайн үед тэр маш их эргэлзэж, хажуугийн шүүгчээс асууж байсан. Дараа нь үзэгчид рүү хараад, гоол хэрхэн орсныг нүдэндээ дүрслэн харах гэж оролдож байсан" гэжээ. Мөн тэрбээр "Харин ням гарагийн тоглолтын тухайд талбайн шүүгч
инээж, бид бүгдийн нүдэн дээр санаанд оромгүй дүгнэлт хийсэн. Тиймээс Л.Фабианогийн гоолыг "Бурханы гар"-аар хийгдсэн гэж хэлж болохгүй" гэсэн байна.

Хэвлэлийн бага хурлын үеэр өгсөн ярилцлагадаа Д.Марадона "Бурханы гар" ганцхан байдгийг сануулаад "Бразильчууд сайн тоглож чадахгүй байна. Гэхдээ тэд тэмцээн бүрт ялж байгаа учир хөгжөөн дэмжигчдийнхээ итгэлийг алдаагүй хэвээр байгаа юм" хэмээн ярьжээ.