ОХУ, Буриад Улсын поп-рок эстрадын уран бүтээлчдийн “Buriad Pop-Stars” нэгдэл томоохон бүрэлдэхүүнтэйгээр арванхоёрдугаар сарын 3-нд анх удаа Монгол Бөхийн өргөөнд тоглох гэж байна.

“Buriad Pop-music” шоу концертыг ганцхан удаа Улаанбаатар хотноо тоглох бөгөөд тоглолтын ерөнхий зохион байгуулагчаар “Buriad Pop-Stars” нэгдэл, Нюанс хамтлаг анх удаа Монголд зохион байгуулах юм.

“Buriad Pop-Stars” уран бүтээлийн нэгдэлийн бүрэлдэхүүнд ОХУлс болоод Буриадад алдартай дуучин Елена Борохитова, Дарима Цырендондопова, Чингис Раднаев, Дулма Сунрапова, Мэдэгма Доржиева, Хатагур зүү, Валико Гаспарян, Орчин үеийн бүжгийн Капучино, Угол зрения хамтлагууд ирж Монголын залуучууд үзэгч олонд шинэлэг, өвөрмөц, гайхалтай шоу тоглолтыг үзүүлхээр бэлдээд байгаа ажээ.

Тус “Buriad Pop-Stars” уран бүтээлийн нэгдэл тоглолтондоо аялгуу дуу, бүжгийн гайхамшигт хэмнэл хөдөлгөөнүүдээр эрч хүчийг мэдрүүлхээс гадна байгалийн үзэсгэлэн хосолсон газар болох Байгал далайн “BAIKAL RIVIERA” жуулчны баазад амрах эрхээр үзэгчдийн дундаас нэг хосыг азтанаар шалгаруулж урамшуулах гэнэ.

Уг тоглолтыг ОХУ-ын Буриад Улсын Соёлын яамны сайд Тимур Цебыков, Монголын нэрт зохиолч МУ Төрийн шагналт, Ардын уран зохиолч С.Эрдэнийн Сангийн зүгээс талархалтайгаар хүлээн авч дэмжлэг үзүүлж байгаа ажээ.