-Би жолооны курст сурч байгаа юм. Хэрэв шалгалтандаа унавал надад үнэмлэх авах ямар нэг боломж үлдэх үү?
-Жолооны сургуулийн төгсөлтийн шалгалтад хангалтгүй дүн үзүүлсэн бол танд дахин шалгалт өгөх боломж бий. Тухайлбал:

1.3амын хөдөлгөөний дүрмийн шалгалтанд тэнцээгүй бол долоо хоног
2.Жолооны шалгалтандаа тэнцээгүй бол 14 хоног
3.Замын хөдөлгөөний дүрмийн шалгалт, жолооны шалгалт хоёуланд нь тэнцээгүй бол 21 хоногийн давтан дамжаанд суралцана.

Жич: Жолооны дамжааны хичээлийн хөтөлбөр хангасан боловч хүндэтгэх шалтгаангүйгээр шалгалтаа өгөөгүй, өгөөд тэнцсэн боловч зургаан сар хэтэрсэн бол мөн 21 хоногийн Хөдөлгөөний аюулгүй байдлын тухай хууль болон Замын хөдөлгөөний дүрэм, Жолооны давтан сургалтад суралцана.

Жолооны давтан дамжаанд суралцахдаа урьд сурсан жолооны дамжааны элсэгчийн тушаалын он...сар...өдөр...дугаарт тодорхой бичсэн хичээлийн хөтөлбөр хангалттайгаа ирж тодорхойлолт (цохолт) авч суралцана.

Өмнө олгогдсон "Авто-3", "Механизм", "Мотоцикл", "Багшлах эрхийн үнэмлэх"-ээ үрэгдүүлсэн тохиолдолд хэдэн оны хэдэн сард, хаана ямар жолооны дамжаанд суралцсанаа өргөдөл дээрээ тодорхой бичиж лавлагаа /Мэргэжил хяналтын хэлтсийн үйлчилгээний танхимаас/ авна.
 
Машиныг ямар нөхцөлд журамлан, саатуулах вэ
-Эрэн сурвалжлагдаж байгаа, зам тээврийн осолд холбогдсон тээврийн хэрэгслийг шаардлагатай гэж үзвэл, согтууруулах ундаа, мансууруулах бодис хэрэглэсэн жолоочийн жолоодсон тээврийн хэрэгсэл, эрхийн үнэмлэхгүй буюу ангилал тохироогүй үнэмлэхтэй хүн жолоодсон, улсын дугааргүй, техникийн гэрчилгээ, ашиглалтын дэвтэргүй, техникийн улсын үзлэг тооллогод ороогүй, техникийн стандартын шаардлага хангаагүй бүрэн бус тээврийн хэрэгслийг түр саатуулах эрх Цагдаагийн байгууллагад бий.

Хэрвээ дээрх зөрчил, ослын улмаас таны машин журамлагдсан бол дараахь байдлаар буцаан авч болно. Гаргасан зөрчлөө харьяа дүүргийн ЗЦТ дээр шийдвэрлүүлээд түр саатуулах байрны төлбөрөө төлсний үндсэн дээр тээврийн хэрэгслээ авна.