УИХ-ын чуулганы нэгдсэн хуралдаанаар өнгөрсөн баасан гарагт Уньт-Тариалангийн хооронд авто зам барих төслийг хэрэгжүүлэх тухай Монгол Улсын Засгийн газар, Арабын эдийн засгийн хөгжлийн Кувейтын сан хоорондын зээлийн гэрээг соёрхон батлах тухай хуулийн төслийн анхны хэлэлцүүлгийг хийж баталлаа.

Энэ үеэр УИХ-ын гишүүд Зам, тээвэр, барилга, хот байгуулалтын сайд Х.Баттулгад олон асуулт тавьсан юм. Үүний нэг нь УИХ-ын гишүүн Ц.Даваасүрэн "Энэхүү зам нь аялал жуулчлалын дэд бүтцэд дэмжлэг үзүүлэх зорилгоор баригдана. Гэтэл таван жил гацаанд байлаа. Үнийн өсөлт гэж хойшлуулдгаа болих хэрэгтэй. Тендерт орсон компаниудад хариуцлага хүлээлгэдэг байх ёстой" гэсэн юм.

Харин салбарын сайд хариулахдаа "Тендерийн аргачлал, төсвөөс хуваарилдаг мөнгийг өөрчлөх хэрэгтэй юм" хэмээлээ.