Нийслэл хотын өдөр тутмын амьдралд мэдээлэл технологийн салбар хэрхэн хувь нэмрээ оруулж болох талаар мэдээлэл технологийн үндэсний паркаас санаачилжээ.

Энэхүү ажлыг нийслэлийн засаг даргын тамгын газар, мэдээлэл технологийн үндэсний парк, Монголын залуу програмчдын холбоотой хамтран зохион байгуулж буй юм.

Уралдаан нь мэдээлэл технологийг ашиглан нийслэлийн өдөр тутмын амьдралын хэв маягт зохицсон бүтээл хийх юм.

Уралдаанд хэн ч ямар ч бүтээлээр оролцож болох бөгөөд бэлэгтэй хогийн сав, автобусны буудлуудыг сайжруулах электрон самбар, ухаалаг гэрлэн дохио гэх мэт та нийслэлд юу хэрэгтэй байгааг хэрхэн харж, яаж сэдэж байна түүгээрээ оролцож болох нь ээ.

Тухайлбал бэлэгтэй хогийн сав гэдэг нь түүнд хог хийсний хариуд баярлалаа гэж хэлэхийн зэрэгцээ дахин боловсруулах хуванцар бүтээгдэхүүнийг өөрөө автоматаар ялгадаг байж болно. Харин электрон самбарын хувьд өөрөө мэдрэгчтэй байх бөгөөд хүн хуруугаа хүргэхэд л таны хүрэх газрын чиглэлийн автобус одоо яг хаана байгаа, хэдэн минутын дараа таны зогсож буй буудал дээр хүрч ирэхийг хэлээд өгнө.

Энэ мэтчилэн оролцогчид задгайгаар сэтгэсэн сонирхолтой санал санаачилгуудыг зохион байгуулагчид өөрийн вэб сайтан дээрээ байрлуулан иргэдэд хүргэнэ.

Тухайн сайтад хандсан хүмүүс өөрийн сэтгэгдлээ үлдээж болох бөгөөд энэ нь бүтээлийг санаачилсан хүний уралдааны онооны байдалд өөрийн гэсэн жингээ дарах юм.

Нийслэлийн хөгжил ба мэдээлэл технологийн оновчтой шийдэл төсөлд шалгарсан эцсийн гурван бүтээл дээр шүүгчид нарийвчилсан судалгаа хийж, НЗДТГ-т өгөх юм. Ингэснээр нийслэлд бидний амьдралын хэв маягт өөрийн гэсэн үүрэг гүйцэтгэдэг эд зүйлс мэдээлэл технологийн дэвшлийг өөртөө агуулж байх нь ээ.

Ө.Хонгорзул