Нийслэлийн мэргэжлийн хяналтын газраас ЕБС-ийн ес, 11 дүгээр анги төгсөгчдийн суурь болон бүрэн дунд боловсролын гэрчилгээ, хувийн хэрэг зэрэг бичиг баримтад шалгалт хийжээ. Үүнд нийслэлийн 198 сургуулийн 32530 орчим сурагч хамрагдсан байна. Уг шалгалтаар сурагчдын хувийн хэрэгт өмнөх жилийн дүнг бичээгүй. Мөн гэрчилгээгээ үрэгдүүлсэн, хувийн хэрэг дутуу, гэрчилгээний овог, регистрийн дугаар зөрсөн, дүн засварласан зэрэг нийт 352 зөрчил илэрчээ.

Түүнчлэн сургуульд шилжиж ирсэн сурагчийн хувийн хэрэгт шилжилт хөдөлгөөний тэмдэглэлийг тухай бүрт нь хийгээгүй. Сурагчдын олимпиад, уралдаан тэмцээнд оролцсоныг бичээгүй. Хувийн хэргийн дүн засвартай, арын хуудсанд сургууль төгссөн тэмдэглэгээ дутуу, зарим сурагчийн 2008-2009 оны хичээлийн жилийн дүнг хувийн хэрэгт огт бичээгүй байжээ. Мөн тодорхойлолт, гарын үсэг, тамга тэмдэг, баталгаажилт дутуу, сурагчдын хувийн хэрэгт тэмдэглэн хөтөлдөг эрүүл мэндийн картыг бүрэн хөтлөөгүй, нэг сургуулиас нөгөө сургуульд шилжихдээ хувийн хэргийг шинэчлэн бичсэн зэрэг нийтлэг зөрчлүүд байгаа нь шалгалтын явцад тогтоогдсон байна.

Дээрх зөрчил гарах болсон шалтгааныг мэргэжилтнүүд тайлбарлахдаа “Зургаан настай сурагчийг сургуульд элсүүлэн сургасан. Мөн 12 жилийн сургалтын тогтолцоонд шилжсэнтэй холбоотойгоор сурагчийн хувийн хэргийн загвар нь шаардлага хангахгүй болсон. Түүнчлэн сурагчдын хичээлүүдийн дүнг суурь боловсролын гэрчилгээ, бүрэн дунд боловсролын гэрчилгээнд дундажлан бичдэг болсон зэрэг нь хувийн хэрэгтэй холбоотой зөрчил ихсэх шалтгаан болсон” гэжээ.

Тиймээс “Сурагчийн хувийн хэрэг хөтлөх, хадгалах заавар”-ыг шинэчлэн боловсруулж өнөөгийн эрэлт хэрэгцээнд нийцүүлэх нь тулгамдсан асуудал болсныг онцолсон байна.

Мөн манай улсын ЕБС-иудад гадаадаас ирж суралцаж буй хүүхдийн боловсролын бичиг баримтыг дүйцүүлэн тодорхойлолт гаргуулалгүй авч суралцуулдаг нь асуудал болоод байгаа гэнэ. Учир нь БСШУ-ны яамнаас гадаадаас ирж суралцаж байгаа хүүхдийн боловсролын гэрчилгээний дүнг хэрхэн, яаж дүйцүүлэхийг тодорхой заагаагүй байдаг. Бүр хэддүгээр ангид суралцахыг ч зааж өгөлгүй тодорхойлолт олгож байгаа аж.

Уг нь гадаадад суралцаж байгаад сургуулиа төгсөлгүй ирсэн сурагчийн хувьд “Суралцагчийн мэдлэг чадварын түвшин тогтоох шалгалтыг жилд нэг удаа Боловсролын асуудал хариуцсан нэгжийн даргын шийдвэрээр байгуулсан ажлын хэсэг хариуцан зохион байгуулж, эцсийн шийдвэр гаргана” гэсэн БСШУ-ны сайдын 2008 оны 112 тоот тушаал байдаг ч огт хэрэгжээгүй байна. Мөн сайдын 2008 оны 113 дугаар тушаалаар баталсан “Анги алгасан суралцах хүсэлтийг шийдвэрлэх журам” шинээр гарсан, журмын шаардлага өндөр байгаатай холбоотойгоор бага ангидаа анги алгасах хэлбэрээр суралцсан болгож бичсэн зөрчил ч багагүй гарсан байна.

Шалгалтын дүнд үндэслэн суралцагчийг анги алгасуулан дэвшүүлэн суралцуулах асуудлаар эцэслэн шийдвэр гаргаагүйгээс шалтгаалан түвшин тогтоох шалгалтаар “F” дүнтэй үнэлэгдсэн сурагчид бүрэн дунд боловсрол эзэмшиж төгсжээ. Мөн төрийн бус өмчийн их, дээд сургуулиуд суралцагчийн хувийн хэрэг байхгүй, дүн засвартай, зарим ангийн дүн дутуу, шилжилт хийгээгүй, тамга тэмдэг, баталгаажилт байхгүй, суурь боловсролын гэрчилгээний дүн засвартай байхад элсүүлж байсан нь илэрсэн байна.

Г.Долгорсүрэнa http://www.niigmiintoli.mn/