ХБНГУ-ын Чөлөөт ардчилсан нам эвслийн Засгийн газар байгуулах яриа хэлэлцээнээс гарснаар танхимаа бүрдүүлэх Ангела Меркелийн зорилтод "саад" учирлаа. "Яриа хэлэлцээнд оролцогч дөрвөн нам Германы цаашдын шинэчлэлийн асуудалд нэгдсэн зорилтод хүрч чадаагүй учраас хэлэлцээг орхисон" гэж Чөлөөт ардчилсан намын тэргүүн Кристиан Линднер мэдэгдсэн байна.

Ийнхүү зах зээл, бизнес эрхлэгчдийг дэмжигч тус нам эвслийн Засгийн газар бүрдүүлэх яриа хэлэлцээнээс гарч байгаагаа илэрхийлснээр Канцлер Ангела Меркель "мухардал"-д ороод байгаа юм. Учир нь дэлхийн дөрөв дэх том эдийн засагтай ХБНГУ-ын Засгийн газар хэрхэн бүрдэх вэ гэдэгт олон улсын ажиглагчид анхаарал хандуулж байна.

Ангела Меркель "Бид хэлэлцээрт хүрч, удаан хугацаанд үргэлжилсэн яриа хэлэлцээг эцэслэхэд ойрхон байна гэж бодож байлаа. Гэхдээ сорилтуудтай тулгарлаа. Энэ нь эвслийн Засгийн газарт орох намууд бие биенээ бүрэн ойлгох ёстой гэдгийг харуулж байна. Миний бие Чөлөөт ардчилсан намтай харилцан тохиролцож чадаагүйдээ харамсаж байна. Гэхдээ эдгээр хүндрэлтэй нөхцөл байдлын үед миний бие Канцлерын хувиар улсаа тэргүүлэн боломжит бүхнийг хийх болно" гэж мэдэгдлээ.

Ийнхүү яриа хэлэлцээ мухардалд орсноор ээлжит бус сонгууль болж магадгүй гэсэн яриа гараад байна. Гэхдээ сонгууль явуулах нь хэт барууны үзэлт Альтернатив намын нөлөөг нэмэгдүүлж болзошгүй гэсэн болгоомжлол улс төрчдийн дунд үүсжээ. Түүнчлэн Ангела Меркелийн хүчийг сулруулж, Засгийн газарт цөөнх суудал авахад хүргэж магадгүй гэж ажиглагчид үзэж байна. Харин өмнөх Засгийн газарт эвслийн хамтрагч байсан Социал демократ намыг ятгах боломж бий гэдгийг улс төр судлаачид онцоллоо. Тиймээс Мартин Шульц Канцлертай хамтран шинэ Засгийн газар бүрдүүлэх боломжтой гэдгээ дахин илэрхийлээд байгаа юм.

Б.Ариунболд