Энэ сургалт дадлага нь манай улсын хувьд өмнөд хөрштэйгээ явуулж байгаа анхны цэргийн хамтарсан сургалт, дадлага бөгөөд ХАЧА-ийн хувьд гадаад улстай явуулж буй энхийг сахиулах ажиллагааны анхны сургалт болж байгаа бөгөөд өндөр ач холбогдол өгч, сайтар бэлтгэсэн байна.

Сургалт, дадлагын ажиллагаа эхэлснээс хойшхи хугацаанд хоёр талын энхийг сахиулах ажиллагааны түүх, туршлага, сургамжийг сонсч, харилцан үзүүлэх сургууль явууллаа. Хятадын тал инжерийн техник хэрэгслийг яаж ашиглаж байгаа, цувааны хамгаалалтыг хэрхэн хийдгээ үзүүлсэн бол монголын дайчид шалган нэвтрүүлэх цэгийн үйл ажиллагаа, бүслэн хаах, нэгжих ажиллагааг явуулах тухай үзүүллээ. Зэвсэгт хүчний дугаар ангийн сургагч ахлагч Н.Баасангийн удирдан явуулсан баазын аюулгүй байдлыг хангах, шалган нэвтрүүлэх цэгийн үйл ажиллагаа бодит цагийн байдалд ойртсон үнэмшилтэй үзүүлбэр боллоо гэж хятадын багийн захирагч өндрөөр үнэллээ.

Сургалт, дадлагад оролцож байгаа цэргийн алба хаагчдын идэвх сайн, хичээл явуулах нөхцөл болоцоо ч сайн байгаа,  үүний хэрээр үр дүн ч сайн гарна гэдэгт итгэлтэй байгаагаа тус сургуулийн удирдан явуулж буй  хүмүүс илэрхийлсэн юм.
ХАЧА энхийг сахиулах ажиллагааны олон жилийн туршлагатай бөгөөд нийт 12721 цэргийн албан хаагч энхийг сахиулах ажиллагаанд оролцсоноос цэргийн ажиглагч болон мэргэжилтэн офицер 1168, энхийг сахиулагч 11553-ыг  илгээжээ.
Одоогийн байдлаар  нийт 1949 цэргийн албан хаагч НҮБ-ын энхийг сахиулах ажиллагаанд үүрэг гүйцэтгэж байна. Эдгээрийн 88 нь цэргийн ажиглагч болон мэргэжилтэн офицер бөгөөд ажиллагааны 9 бүсэд үүрэг гүйцэтгэж, энхийг сахиулах 11 салбар багийн 1861 цэрэг НҮБ-ын ажиллагааны 5 бүсэд ажиллаж байна.