"Хар сарнай" гэдэг нэр залуусын дунд моод болж байсан үе саяхан. Тэдний дууны өнгө аяс, этгээд хувцаслалт, дүр төрх нь тэр үеийнхээ сонсогчдыг өөртөө татаж байв. Удалгүй хамтлагийн залуус харийн орныг зориход үнэнч фенүүд нь тэднийг хүлээгээд хоцорсон. Гэвч шинэхэн уран бүтээлийг сонсохыг хүссэн залуусын горьдлого талаар болсон удаа бий. Учир нь Амраа, Маадай хоёр уран бүтээл хийхээ больж, бизнест хүчээ үзэж эхлэв.

Өнгөрсөн жил "Хар сарнай" хамтлагийн тоглолт болно гэж баахан шуугисан ч долоон сарын 1-ний үймээнээр шалтаглан фенүүдээ "хошгируулаад" амжсан. Одоо Амраа хувийн бизнесээ хөөгөөд завгүй яваа сурагтай. Харин Маадайгийн хувьд "Next star" продакшн байгуулж, залуу дуучдын уран бүтээл дээр ажиллаж байгаа гэнэ лээ. Мөн кино бизнест хүчээ сорьж, тус продакшны бүтээсэн "9009" нэртэй уран бүтээл саяхан үзэгчдэд хүрсэн. Одоогоор "Хар сарнай" хамтлагийн сонсогчиддоо амласан тоглолт хэдийд болох нь тодорхойгүй байгаа ч хэзээ нэгэн цагт хэлсэн амандаа хүрэх байх гэж фенүүд нь найдан сууна.