Замын цагдаагийн газрын Мэргэжил хяналтын хэлтсийн байцаагч, цагдаагийн ахмад Ж.Баярсайхан уншигчдын асуултад хариулж байна.

-Өнгөрсөн жилийн зургадугаар сард жолоо барих эрхээ хасуулсан юм. Одоо үнэмлэхээ яаж авах вэ?
-Нэг жилийн хугацаагаар эрхээ хасуулсан бол Замын цагдаагийн газрын Мэргэжил хяналтын хэлтсийн үйлчилгээний заалны хоёр, гурав дугаарын цонхонд ирж тухайн эрх хасуулсан хугацаа нь дууссан гэсэн лавлагаа авна. Тэгээд долоо хоногийн мягмар, пүрэв гаригуудад Батлан хамгаалах туслах нийгэмлэг дээр очиж замын хөдөлгөөний дүрмээр 10 асуулттай карт бөглөж шалгалт өгнө. Нэг жил болон түүнээс дээш хугацаагаар хасуулсан бол аль нэг дурын авто сургуульд долоо хоног дүрмийн давтан курст сууна. Түүнээс гадна зургаан сараар жолоо барих эрхээ хасуулчихаад үнэмлэхээ сэргээж авалгүйгээр дахин зургаан cap болсон тохиолдолд нэг жил гэж үзэж дахин давтан курст хамруулна гэдгийг хэлье.

-Би жолооны үнэмлэхээ хулгайд алдчихсан. Шинээр авахад ямар бичиг баримт бүрдүүлэх вэ, хэд хоногийн дотор гарах вэ?
-Жолооны үнэмлэхээ гээгдүүлсэн, хулгайд алдсан хүмүүс үнэмлэхээ сэргээлгэхийн тулд иргэний үнэмлэх, эмнэлгийн үзлэгт хамрагдаж тэнцсэн эрүүл мэндийн хуудас, хоёр хувь өнгөт зураг, үнэмлэхний үнэ болох 12500 төгрөгийг банкинд тушаасан баримтын хамт авчирна. Эдгээр баримтаа Замын цагдаагийн газрын Мэргэжил хяналтын хэлтсийн үйлчилгээний заалны 06 дугаарын цонхонд авч ирээд жолооны үнэмлэхээ хүчингүй болгож зарлуулна Зарлуулахад 2,500 төгрөг. Хаясан гээсэн үнэмлэхийг ажлын долоо хоногт багтаан гаргаж байгаа.

-Сая жолооны курс төгссөн юм. Үнэмлэх хэзээ гарах вэ?
-Шинэ үнэмлэх гарах ёстой хугацаанаасаа үндсэндээ 40 гаруй хоногоор хойшлогдож яваа. Ганцхан машинаар хэвлэж байгаа учраас ачаалал ихтэй, хуучин хуримтлагдсан үнэмлэхээ хэвлэж арай дуусаагүй.

-Би хуучин үнэмлэхээ солиулах гэсэн юм. Шинэ үнэмлэх гартал нь машинаа барьж болох уу?
-Энэ боломжгүй. Үнэмлэхээ авсныхаа дараа л машинаа жолоодно. Жолооны хуучин үнэмлэхийг шинээр солиулахдаа хаясан гээсэн үнэмлэх авах гэж буйтай адилхан бичиг баримт бүрдүүлнэ. Таны шинэ үнэмлэх ажлын долоо хоногт багтаж гарна.

-Өнгөрсөн жилийн арваннэгдүгээр сард жолооны курст суусан юм. Дүрмийн шалгалтаа өгчихөөд хөдөө яваад саяхан ирлээ. Одоо автодром, хотын жолоодлогын шалгалтаа өгч болох уу?
-Тухайн шалгалт нь зургаан сарын хугацаанд хүчинтэй байдаг. Тиймээс таны арваннэгдүгээр сард өгсөн шалгалт хүчингүй болчихсон Одоо дахиад дүрмийн шалгалтаа үлдсэн хоёр шалгалттай хамт өгөх хэрэгтэй болно. Батлан хамгаалах туслах нийгэмлэг дээр мягмар, пүрэв гаригт 10.00 цагаас шалгалт авч байгаа.

-Батлан хамгаалах туслах нийгэмлэг хаана байдаг вэ?
-Гурвалжингийн гүүрээр урагшаа даваад Буудлагын спорт клубын баруун талд бий.

-2003 онд нэг жолооны курст суугаад шалгалтаа өгч тэнцсэн юм. Тэр үед үнэмлэхээ авч чадаагүй. Энэ чигээрээ явсаар байгаад одоо авах гэтэл нөгөө жолооны курс олдохгүй байна. Хаана хандах вэ?
-Энэ тухай хүсэлтээ ЗЦГ-ын Мэргэжил хяналтын хэлтэст өргөдөл бичиж гаргана. Мөн иргэний үнэмлэх, эмнэлгийн үзлэгт хамрагдаж тэнцсэн эрүүл мэндийн хуудас, хоёр хувь цээж зураг, жолооны үнэмлэхний үнэ 12500 төгрөгийг Төрийн санд тушаасан баримт зэргийг бүрдүүлээд манай үйлчилгээний заалны тавдугаар цонхонд үүрэг гүйцэтгэж байгаа ажилтанд өгч асуудлаа шийдүүлэх боломжтой.

-Миний жолооны үнэмлэх В ангилалтай юм. С, Е, Д-г зэрэг даруулж болох болов уу?
-Энэ гурван ангиллыг зэрэг даруулах эрх зүйн боломж байхгүй. Эхлээд ангилал ахиулах давтан курс сууж С ангиллаар шалгалт өгнө. Тухайн ангилал авснаас хойш нэг жилийн дараа Д, Е ангиллын давтан курст зэрэг суугаад авч болно.

-В,С, Е ангилалтай бол яаж Д ангилал даруулах вэ?
-Е, Д ангиллыг ахиулахын тулд мэргэжил ахиулах давтан курст суралцах ёстой. Дурын жолооны сургуульд 21 хоног суралцаад авч болно.