Байгаль орчин аялал жуулчлалын яамнаас өнгөрсөн 100 хоногт хэрэгжүүлсэн ажлаа тайлагналаа.

Энэ үеэр Байгаль орчин аялал жуулчлалын сайд Б.Бат-Эрдэнэ "Өмнөд Солонгосын жуулчдыг визгүй зорчуулах асуудал шийдэгдэж буй. Эргээд Монгол Улсаас Өмнөд Солонгост зорчих жуулчдад ямар боломж олгох талаар ирэх долоо хоногоос Өмнөд Солонгост очиж ажиллана. Өнгөрсөн долоо хоногт Өмнөд Солонгосын элчин сайдтай уулзсан. Агаарын тээвэр болон, визийн асуудал шийдэгдвэл Өмнөд Солонгосын хийсэн судалгаагаар дараагийн гурван жилд багадаа 577 мянган жуулчин Монголд ирэх бүрэн боломжтой" гэв.

Монгол Улсад ирэх визийг E-Visa-руу шилжүүлж байгаа бөгөөд одоогоор 30 гаруй орноос ирэх жуулчдын мэдээллийг E-Visa-д оруулсан байна.

ӨВӨЛ ХӨВСГӨЛ НУУРТ ДУРААРАА ЗОРЧДОГИЙГ ХОРИГЛОНО

БОАЖ-ын сайд сэтгүүлчдийн асуултад хариулж байна. Тэрээр "Хөвсгөл нуурын дэргэд нуурыг судлах лаборатори байгуулах ёстой гэж үзэж байна. 2024 он гэхэд тус нуурт живсэн 28 тээврийн хэрэгслийг гаргана. Тээврийн хэрэгслүүд 50-100 метрийн гүнд бий. Монголын шумбагч нар 50 хүртэлх метрийн гүнд шумбадаг туршлагатай. Хөвсгөл нуурт өвлийн цагаар зорчих маршрут гаргана. Дураараа зорчдогийг хориглох шийдвэрийг энэ долоо хоногт гаргана. Нуур руу орж ундаалдаг ан амьтад хэт их хашаалсны улмаас амьдрах нөхцөлгүй болж байна. Энэ асуудал малчдад ч мөн бий. Хөвсгөл нуурын дэргэд байгаа жуулчны компаниуд нүхэн жорлон хэрэглэхгүй. Нуур руу бохир усаа цутгахгүй. Эдгээрийг БОАЖ-н яамнаас хориглож буй" гэв.

"МИШЭЭЛ СИТИ" ХҮРЭЭЛЭНГ ЯАРМАГИЙН ГҮҮРНЭЭС ЗАЙСАН ХҮРТЭЛ ӨРГӨЖҮҮЛНЭ

"Мишээл сити" байгаль орчин танин мэдэхүйн хүрээлэнг олон байгууллага дэмжиж Яармагийн гүүрнээс Зайсан хүртэл болгож өргөжүүлэхээр ажиллаж байна. Мөн хоёр жилийн хугацаанд Баянзүрхийн гүүрнээс Сонгинын гүүр хүртэл сунгаж гол дагасан амралт чөлөөт цагаа өнгөрүүлэх газар байгуулах төлөвлөгөөтэй байна. Мэдээж арчлах эзэнтэй, аж ахуй нэгжүүд тэндээсээ орлогоо олдог байдлаар зохицуулна гэж БОАЖ-ын сайд Б.Бат-Эрдэнэ хэлэв.

БОГД ХААН УУЛЫН ХАМГААЛАЛТЫН БҮСИЙГ ТЭЛНЭ

Богд хаан уулын хамгаалалтын бүсийг тэлнэ. Улмаар хязгаарлалтын бүсэд барилга баригдах нь багасна. Хамгаалалтын бүсийг 5562 га газраар тэлж, хязгаарлалтын бүсийг багасгана. Соёмботой уулын оройд гурван аж ахуй нэгжид газар олгочихсон. Үүнийг цуцлахаар ажиллаж байна.

Соёмботой ууланд "Лувсанданзанравжаа" хэмээх ТББ соёлын буюу шашны үйл ажиллагаа эрхлэх журмаар анх газар авсан. Анхны төсөл нь бурхан багш бүтээхээр зөвшөөрөл авсан. 2014 онд анх 1.7 га газрын зөвшөөрөл аваад 2018 онд газраас 51 га болгон тэлсэн. Тэр газраа хамгаалах, соёл аялал жуулчлалаар хөгжүүлнэ хэмээн газраа тэлсэн гэж БОАЖЯ-аас мэдээллээ.

ХАШААНДАА ТАРЬСАН МОДНЫ НАСААР ЗЭЭЛИЙН МӨНГӨН ДҮН НЭМЭГДДЭГ БОЛОХ ТАЛААР ЯРИЛЦАЖ БАЙНА

Ойн стратегийн дагуу олон нийтийг хашаандаа мод тарихыг уриалж дэмжих хэрэгтэй. Үүний тулд хашаанд тарьсан модыг насжилтаар нь үнэлж зээл авахдаа хашаа, байшин, газраа үнэлдэг шиг үнэлгээний системд оруулж зээлжих эрх дээр нь мөнгөн дүн нэмэгддэг болох талаар ярилцаж байна.

БОАЖЯ-ны томоохон хурлыг говьд хийхээр төлөвлөж байна. Мөн дараагийнх нь уулзалтыг нуур, голын дэргэд хийнэ.