Өсвөр үеийн буюу U18 насны улсын аварга шалгаруулах тэмцээн Өмнөговь аймгийн Даланзадгад хотноо боллоо. Тэмцээнийг Монголын сагсан бөмбөгийн холбоо зохион байгуулсан бөгөөд Өмнөговь аймгийн Биеийн тамир спортын газар хамтран ажилласан байна. 

Энэ удаагийн улсын аваргын тэмцээн хөдөө орон нутагт болж байгаагаараа онцлогтой байсан бөгөөд эрэгтэй найм, эмэгтэй таван баг оролцож шилдгүүдээ тодрууллаа. Тэмцээн дөрвөн өдрийн турш үргэлжилж, эрэгтэй багууд хоёр хэсэгт хуваагдан тоглосон бол эмэгтэй багууд тойргийн журмаар тоглосон юм.      

Улмаар тэмцээний эмэгтэй аваргын алтан медалийг Гурван тамир, мөнгөн медалийг Дундговь, хүрэл медалийг Эрдэнэт эрдмийн сан баг хүртлээ. Харин эрэгтэй аваргын алтан медалийг Этүгэн, мөнгөн медалийг MIU, хүрэл медалийг Modun Wolves баг хүртлээ. 

Энэ тэмцээн нь Монголын сагсан бөмбөгийн холбооны календарчилсан төлөвлөгөөний дагуух зургаа дахь улсын аваргын тэмцээн болсон юм. УдахгүйU16, U17 насны улсын аваргууд Сэлэнгэ, Дархан-Уул аймагт болсноор 2022 оны өсвөрийн үеийн улсын аваргын тэмцээнүүд явагдаж дуусах юм.