2022 оны I улирлын байдлаар Хувийн хөрөнгө оруулалтын 24 сан, Хамтын хөрөнгө оруулалтын хоёр сан үйл ажиллагаа эрхэлж байгааг Санхүүгийн зохицуулах хороо мэдээллээ.

Хууль, эрх зүйн орчин сайжирснаар сүүлийн жилүүдэд хөрөнгө оруулалтын сангууд нэмэгдэж байгаа аж. Өөрөөр хэлбэл мэргэжлийн хөрөнгө оруулагчид захад идэвхжиж байгаа энэ үед жижиг хөрөнгө оруулагчид урт хугацаанд хөрөнгөө өсгөх, өгөөж хүртэх, ногдол ашиг авах нөхцөл нь сайжрах давуу талтайг онцолж болно.

Биржид бүртгэлтэй Хөрөнгө оруулалтын хоёр сангийн арилжааны идэвх нэмэгдэж байгаатай зэрэгцэн хөрөнгө оруулагчдын тоо ч өсөж байгаа ажээ.

2021 онд биржид бүртгэлтэй Хөрөнгө оруулалтын сангийн нэгж эрхэд нийт 56.9 тэрбум төгрөгийн арилжаа хийсэн нь өмнөх оноос 11 дахин өссөн үзүүлэлт болсон юм. Түүнчлэн нийт үнэт цаасны арилжааны үнийн дүнгийн дөрвөн хувийг бүрдүүлсэн байна. Шинэ бүтээгдэхүүн гэхэд энэ бол өндөр дүн болж байгаа аж.

Харин оны эхний улиралд “Мандал ирээдүйн өсөлт” болон Үндэсний хувьчлалын сангийн нэгж эрхэд нийт 1.2 тэрбум төгрөгийн арилжаа хийжээ. Үнийн дүнгийн хувьд өмнөх оны мөн үеэс 3.4 дахин буурсан дүн болов.

Үүнд инфляц өссөн зэрэг хүчин зүйлээс шалтгаалан захад бүхэлдээ энгийн арилжааны идэвх сул байсан нь нөлөөлсөн байна. Хэдий тийм боловч эдгээр сангуудад хөрөнгө оруулагчдын тоо идэвхтэй өсөн нэмэгдэж байгаа юм.

Тавдугаар сарын 31-ний өдрийн Үнэт цаасны төвлөрсөн хадгаламжийн төвийн үнэт цаасны төвлөрлийн судалгаанаас харахад биржид бүртгэлтэй хоёр сангийн харилцагчдын тоо он гарсаар 180-аар өсөж, 13 мянга 823 болжээ.

Цаашид банкны IPO эхлэхэд санд санхүүжилт хийсэн эдгээр хөрөнгө оруулагчдын хөрөнгө өсөх боломжтойг сангуудын зүгээс тодотгож байгаа юм.

Б.Энхжин