Улсын хэмжээнд инфляц нэгдүгээр сард 14.6 хувь боллоо. Ийнхүү 14.6 хувь болсон нь 2011 оноос хойших дээд түвшин болж байна.

Бүлгээр нь задалж харвал хүнсний бараа, ундаа, усны бүлгийн үнэ хамгийн их буюу 21.3 хувиар өсжээ. Үүний дотор мах, махан бүтээгдэхүүний үнэ 23.9 хувиар өссөн байна.

Тээврийн бүлгийн үнэ мөн 21.1 хувиар өссөн нь инфляцад гол жин даржээ. Түүнчлэн инфляцын 47.3 хувь нь импортын барааны үнийн өсөлтөөс шалтгаалсан байна. Импортын барааны үнийн өсөлтийн нөлөөлөл өмнөх оны мөн үеэс 1.5 нэгж хувиар нэмэгджээ.

Монголбанк "Инфляц нэгдүгээр сард оргил үедээ хүрээд эргэн буурах төлөвтэй" гэж өмнө нь мэдээлж байв. Хэдий тийм боловч нэгдүгээр сард Мөнгөний бодлогын хороо ээлжит бусаар хуралдаж, бодлогын хүүг 0.5 нэгж хувиар нэмсэн юм. Энэ нь одоогоор инфляц нийлүүлэлтийн гаралтай эрчимжээд байгаа ч эрэлт талаас өдөөгдөж хавсрах магадлалтай гэж үзсэн байна.

Нөгөө талаас томоохон эдийн засагтай улсууд мөнгөний бодлогоо чангаруулж эхэлсэнтэй холбоотойгоор Мөнгөний бодлогын төлөвөө чангатгах шаардлага үүсэж байгааг дурдаж байсан юм.

Олон улсад инфляцын дарамт 2022 онд ч байсаар байхыг шинжээчид анхааруулж байна. Сүүлийн байдлаар АНУ-ын инфляц 7.5 хувь болж, сүүлийн 40 жилийн дээд түвшинд хүрсэн юм. Иймээс Холбооны Нөөцийн банк мөнгөний бодлогоо илүү хурдацтай, далайцтайгаар чангаруулах магадлал нэмэгдэж байгаа аж.

АНУ-ын Холбооны Нөөцийн банк гуравдугаар сард бодлогын хүүгээ нэмэх нь тодорхой болоод байна. Энэ онд гурван удаа бодлогын хүүгээ нэмнэ гэж байсан ч инфляцын үзүүлэлтээс хамаараад давтамжаа нэмж долоо болгож магадгүй байгаа юм.

Европын Төв банкны хувьд илүү харзнасан байр суурьтай байна. Европын Төв банкны тэргүүн Кристин Лагард “Мөнгөний бодлогоо яаран чангатгах нь эдийн засгийн өсөлтөд сөргөөр нөлөөлөх аюултай” гэж анхааруулж байсан юм.