Түүхэн дэх хамгийн урт морин аялал болох "Хөх чонын сүлд-2022" өнгөрөгч тавдугаар сарын 2-нд Монголын говьд эхэлсэн билээ. АНУ, Канад, Австрали, Их Британи, Нидерланд улсын 19 аялагч 3640 км замыг 84 хоногт мориор туулан сүүлийн цэг болох Алтай Таван богд ууланд хүрчээ.

Говийн нутгаас эхэлж, Монголын бараг бүх газар нутгийг дайран өнгөрсөн "Хөх чонын сүлд-2022" морин аялалыг Veloo сангаа санаачлан зохион байгуулсан юм. 84 хоногийн хугацаанд үргэлжилсэн хандивын морин аялалын турш 100 мянган ам.доллар босгож, тус мөнгийг өнчин, эмзэг бүлгийн хүүхдүүдэд туслахад зарцуулна гэдгээ мэдэгдсэн.

Тэгвэл тус сангаас мэдээлж буйгаар 3640 км замыг мориор туулан аялалын сүүлийн цэгт очиход тэд дэлхийн өнцөг булан бүрээс 107,250 ам.долларын хандивыг босгож чадсан байна.

Veloo сан Монголд 2011 оноос эхлэн нийгэмд чиглэсэн хэд хэдэн хөтөлбөрүүдийг Улаанбаатар, Эрдэнэ сум, Дархан хотуудад хэрэгжүүлж эхэлсэн. Харин тэдний хамгийн гол төсөл болох СХД-т байрлах "Нарны Хүүхдүүд" хүүхдийн цэцэрлэг 2013 оны есдүгээр сараас тогтвортой үйл ажиллагаагаа эрхэлж буй.

Эх сурвалж: Blue Wolf Totem Expedition2022