Монголын их, дээд сургуулиудын консерциумаас оюутан элсүүлэх журамдаа өөрчлөлт оруулсны улмаас зарим сургууль босго оноогоо нэмжээ.

Өмнөх жилүүдэд элсэлтийн ерөнхий шалгалтын босго оноо 400-500 байсан бол энэ жил Санхүү, эдийн засгийн дээд сургуульд бүх мэргэжлээр элсэхэд босго оноо нь 620 байх хэрэгтэй болжээ.

Мөн МУИС-д элсэхийн тулд ерөнхий шалгалтдаа 560 оноо авсан байх шаардлагатай бөгөөд бусад сургуулиуд ч мөн 400 болон түүнээс дээш оноотой суралцагчийг элсүүлэхээр журмандаа заасан байна.

Ихэнх сургуулиуд ийнхүү босго оноогоо нэмж байгаа нь сургалтын чанарыг сайжруулах зорилготой ажээ. Хэдийгээр сургалтын чанарт анхаарч байгаа ч "арын хаалга", хандиваар элсэгчдийн тоо нэмэгдэх вий гэсэн хардлага эцэг, эхчүүдийн дунд байна. Тэд босго оноондоо хүрч шалгалтаа сайн өгсөн ч хүссэн сургуульдаа элсэн орж чаддаггүй хүүхдүүд байдаг талаар ярьж байна.

Дашрамд дурьдахад, ШУТИС-ийн ихэнх мэргэжлийн хичээлийн босго оноо өөрчлөгдөөгүй хэвээрээ байна. Элсэгчид хуваарь сонгох, татгалзах, түүнийг дараагийн хүнд олгох үйл ажиллагаа ил тод явагдах бөгөөд хэд хэдэн мэргэжлээр өрсөлдөж тэнцсэн ч зөвхөн нэгийг нь сонгох журамтай.

МУИС - 560-690
ШУТИС - 500-с дээш
СЭЗДС - 620
Удирдлагын академи - 600
МУБИС - 480
Хүмүүнлэгийн ухааны их сургууль - 560-640
ХААИС - 440-560
ЭМШУИС - 560
Их засаг их сургууль - 500-550 дээш
Орхон их сургууль - 400-аас дээш

Э.Майцэцэг