Сансар огторгуйн тухай ойлголт монголчуудын хувьд хол хөндий санагддаг. Тэгвэл дэлхийн улс орнууд тэр дундаа хөгжиж буй орнууд ч сансар судлалын чиглэлээр эрчимтэй ажиллаж эхэлжээ.

Тиймээс “Сансар дахь бидний мөрөөдөл” төрийн бус байгууллага, Нийслэлийн Нэгдүгээр сургууль хамтран хүүхдүүд болон их, дээд сургуулийн оюутнуудын дун анх удаа хиймэл дагуул зохион бүтээх, түүнийг хэрэглээнд нэвтрүүлэх улсын хэмжээний уралдааныг зохион байгуулж байна. “Сансар дахь бидний мөрөөдөл” нэртэй тэмцээнд оролцогчдыг энэ сарын 10-наас хойш сарын хугацаанд бүртгэнэ.

Зохион байгуулагчид сонирхсон хүүхдүүдийг бүртгэхээс гадна хот, хөдөөгийн олон сургуулиар явж, хүүхдүүдийг сонгон шалгаруулж авах гэнэ.

“Манай улсад сансар судлалын мэргэжлийн хүн ховор. Сансрын тухай мэдээллийг олон нийтэд хүргэх, хиймэл дагуул хөөргөх, хүүхэд залуусын сэтгэн бодох мөрөөдлийг тэтгэх  зорилгоор энэ тэмцээнийг зохион байгуулж байна.

Уралдаанд багаараа оролцох юм. Өрсөлдөөн багуудын дунд явагдах учир ганцаараа оролцогчийг зохион байгуулагчид багт хуваарилна. Сонгон шалгаруулалтаас үлдсэн гурван багийг компаниуд дэмжиж ажиллахаа мэдэгдсэн.

Энэ тэмцээний үр дүнд сансар судлал, хиймэл дагуулын талаар хүүхэд, залуус, ард иргэдийн мэдлэг мэдээлэл сайжирна. Сансар огторгуйн талаар олон төрлийн судалгаа явуулахад хиймэл дагуулын ач холбогдол их” гэж тус төрийн бус байгууллагын гүйцэтгэх захирал Ц.Нандинбаатар ярилаа.
Америкт өнгөрсөн арваннэгдүгээр сард ахлах сургуулийн хүүхдүүд хиймэл дагуул хөөргөсөн. 2015 онд бага ангийнхан хиймэл дагуул хөөргөхөө мэдэгдсэн байна.