Бага ангийн хүүхдийн үүрэх ёстой цүнхний жин нь хүүхдийн биеийн жингийн 10 хувиас хэтрэхгүй жинтэй байх ёстой аж. Жишээ нь, таны хүүхэд 30 кг жинтэй бол 3 кг-аас бага жинтэй цүнх үүрнэ гэсэн үг.

Хүүхэд өөрөө өсөж яваа бие махбодь учраас хүнд цүнх нь хүүхдийн нуруу, хүзүү, мөр, гар болон биеийн бусад хэсгийн хөгжилд сөрөг нөлөө үзүүлдэг байна.

Австралийн Нуруу нугасны мэргэжлийн багаас гаргадаг сэтгүүлд сургуулийн насны хүүхдийн үүрч яваа цүнхний дундаж нь тэдний нас, биеийн онцлогт тохироогүй болохыг тогтоосон байна. Иймд тэд сургуулийн бага насны хүүхдийн үүрч явах ачааны хүндийн дундаж хэмжээг тогтоож стандарт гаргасан байна.

Мөн сургуулийн сурагчдын 79.1 хувь нь тэдний цүнхний ачаа хүнд байдаг, 65.7 хувь нь цүнх хүнд байгаагаас болж ядардаг, 50.0 хувь нь хүнд цүнх үүрсний улмаас нуруу нь өвддөг болохыг тогтоожээ.

Та ч гэсэн хүүхдийнхээ цүнхийг нэг жинлээд үзээрэй. Хэрэв дээр дурдсан хэмжээнээс хүнд цүнх хүүхэд тань үүрч байвал Нийгмийн эрүүл мэндийн хүрээлэнгийн мэргэжилтэн, докторант Б.Сувдын бэлтгэсэн зөвлөгөөний дагуу хүүхдийнхээ цүнхийг хөнгөн болгох аргуудаас хэрэгжүүлээд үзээрэй.

1.Цүнхээ зөв үүрч явах техникийн зааж өгөх:

• Нэг мөрөндөө хэзээ ч үүрч болохгүй, хоёр мөрөндөө үүрэх хэрэгтэй,
• Мөн хэт бариу оосортой цүнх хүүхдийг чөлөөтэй амьсгалахад саад учруулдаг тул цүнхний мөрөвчийг суллах. Ном, дэвтрээ хийсний дараа хүүхдийн цүнхийг үүрүүлэхэд доод тал нь хүүхдийн аарцганд, дээд тал нь мөрний хэмжээнд байхаар оосрыг нь тааруулах
• Цүнхний мөрөвч өргөн байх тусам цүнхний хүнд, хөнгөнийг хүүхдийн биед жигд хуваарилахад тусалдаг. Таны хүүхдийн цүнхний мөрөвч нарийн бол өргөн болгох мөн бүсэлхийгээр бүсэлдэг бүслүүр хийж өгөөрэй,
• Хүнд жинтэй хавтгай зүйлийг аль болох нурууных нь талд хийх

2.Цүнхний ачааллыг бууруулж болох аргууд

• Боломжтой бол гэрт нь сургууль дээр хэрэглэдэг номыг авч өгөх
• Хүүхдээ хүргэж өгөхдөө цүнх нь хүнд байгаа эсэх болон өвдөлт өгч байгааг байнга асууж шийдлийг олж байх
• Биеийн тамирын хувцас, хөгжмийн зэвсэг зэрэг хүнд зүйлсээс гадна хүүхдийн цүнхэнд хүнд байх хичээлийг хэрэгслийг зохицуулж өгч явуулах
• Цахимаар даалгаврыг нь явуулах
• Сургууль дээр хүүхэд бүрт номоо хадгалах хайрцаг хийх зэрэг байж болох юм.