Дөрвөн аймгийн нисэх онгоцны буудлыг олон улсын зэрэглэлтэй болгож, Архангай аймгийн онгоцны буудлыг татан буулгажээ. Энэ талаар ИНЕГ-ын хэвлэлийн төлөөлөгч Д.Отгонжаргалаас тодруулав.

-Дөрвөн аймгийн нисэх онгоцны буудлыг олон улсын статустай болгож байгаа гэсэн. Ямар учиртай юм бэ?
-Монгол Улсын Засгийн газрын 2007 оны 69 дүгээр тогтоолыг хэрэгжүүлэх зорилгоор Ховд, Өмнөговь, Хөасг.өл, Дорнод аймгийн нисэх буудлыг олон улсын статустай болгохоор шаардлагатай тоног төхөөрөмжийг авч, эрх зүйн баримт бичиг боловсруулж дууссан. Тухайлбал, Ховд-Урумчийн чиглэлийн нислэгт бэлтгэж Ховд аймгийн нисэх буудлын барилгын бүтцэд өөрчлөлт хийж хил гааль, хорио цээр мэргэжлийн хяналт, гадаадын харьяаллыг бүртгэх зэрэг байгууллагын ажлын өрөөнүүдийг тусгаарласан. Мөн Мөрөн-Эрхүү-Улаан-Үдийн чиглэлд зориулж Хөвсгөл аймгийн Мөрөн нисэх буудлын зорчигчдийн танхимд ачаа тээш хүлээн авах конвейр суурилуулж, хөгжлийн бэрхшээлтэй иргэдэд зориулсан налуу явах урсгал гаргаж, хилийн болон хорио цээрийн өрөөг ашиглалтад оруулсан. Энэ чиглэлийн агаарын гарц хаалгыг энэ оны дөрөвдүгээр сард албан ёсоор нээсэн. Өмнөговь аймгийн нисэх буудалд газрын тусгай үйлчилгээний бага оврын трактор чиргүүл, галын машин, аэродромын цэвэрлэгээ, үйлчилгээний автомашинийг шилжүүлээд байна.

-Архангай аймгийн нисэх онгоцны буудлыг татан буулгах шалтгаан нь юу вэ?
-Архангай аймгийн хувьд хэд хэдэн шалтгаан байгаа юм. Жилдээ хоёроос гуравхан нислэг хүлээж авдаг, нисэх зурвас нь шаардлага хангадаггүй, аймгийн төвтэй хэт ойрхон гэсэн шалтгаан бий. Мөн хэтдээ шинэ буудал барихаар яригдаж байгаа юм шиг байна билээ.

-Татан буулгасанаар ерөөсөө онгоц буухгүй гэсэн үг үү?
-Татан буулгасан ч гэсэн харуул хамгаалалттай байгаа. Яагаад гэхээр онцгой үед онгоц буух ёстой.

Г.Даваабаатар