АНУ-ын ерөнхийлөгч Дональд Трамп баасан гарагт ОХУ-ын ерөнхийлөгч Владимир Путинээс Курск мужид буй Украины цэргүүдийн амийг өршөөхийг хүсжээ.

Хариуд нь Путин хэрэв тэд бууж өгвөл тэднийг амьд үлдээнэ гэж мэдэгдсэн байна.

Гал зогсоох асуудлаар Трампын төлөөлөгч Стив Уиткофф пүрэв гарагт Москва хотод Путинтэй уулзсан. Уулзалтыг маш үр дүнтэй болсон хэмээн Трамп хэлсэн юм.

АНУ-аас санал болгосон гал зогсоох саналыг Украины тал дэмжсэн бөгөөд Оросын талд танилцуулсан юм.

Трампын мэдээллээр Оросын арми Курск мужид байрлаж буй Украины хэдэн мянган цэргийг бүрэн бүсэлсэн бөгөөд тэд маш хүнд нөхцөлд байгаа гэв.

Трамп “Би Путинээс украин цэргүүдийн амийг өршөөхийг хүслээ. Энэ бол Дэлхийн хоёрдугаар дайнаас хойш хамгийн аймшигт хядлага болно. Тэднийг бүгдийг нь бурхан ивээг” хэмээн цахим сүлжээндээ нийтэлсэн байна.

Путин Украины цэргүүдийг энгийн иргэдийн эсрэг гэмт хэрэг үйлдсэн гэж буруутгаж байгаа ч Украины тал үүнийг эрс няцаажээ. Гэсэн хэдий ч Трампын хүмүүнлэгийн уриалгыг ойлгож байгаагаа Путин илэрхийлжээ. 

Путин "Хэрэв Украины цэргүүд зэвсгээ хураалган бууж өгвөл тэдэнд амь нас болон нэр төрийн баталгаа өгнө. Үүнийг олон улсын хууль болон ОХУ-ын хууль тогтоомжийн дагуу хийх болно" гэв.

Гэхдээ ОХУ-ын Аюулгүйн зөвлөлийн дэд дарга, ерөнхийлөгч асан Дмитрий Медведев цахим сүлжээндээ "Хэрэв Украины цэргүүд бууж өгөхөөс татгалзвал тэднийг системтэйгээр, өршөөлгүйгээр устгана" гэж бичсэн байна. 

Харин Украины арми Оросын цэргүүдэд бүслэгдсэн зүйл байхгүй гэдгийг мэдэгдээд байна.

Эх сурвалж: Reuters