УИХ-ын 2025 оны хаврын ээлжит чуулганы нээлтийн дараа УИХ дахь МАН-ын бүлгийн анхны хуралдаан боллоо. Хуралдаанд Сангийн сайд Б.Жавхлан “Төсвийн гүйцэтгэл, макро эдийн засгийн нөхцөл байдал”-ын талаар танилцуулга, мэдээлэл хийлээ. 

Мөн цаг үеийн нөхцөл байдал, Засгийн газрын бодлого, шийдвэрүүдийг танилцуулсан юм.

Олон улсад гарч буй гэнэтийн шийдвэр, геополитикийн нөхцөл байдалтай холбогдуулан экспортын гол нэрийн бүтээгдэхүүн нүүрсний үнэ буурч байгаа хэдий ч алт, зэс, жоншны үнэ өсөж, төмрийн хүдрийн үнэ тогтвортой байгаа нь төсөвт тодотгол хийх эрсдэл үүсгэхгүй гэж Сангийн сайд онцоллоо.

ГЭВЧ БОДИТ БАЙДАЛ ЯМАР БАЙНА ВЭ?

Экспорт өмнөх оны мөн үеэс 8.1 хувиар буурсан. Гадаад худалдааны тэнцэл 294 сая ам.долларын ашигтай гарсан ч 2023 оноос хойших хамгийн бага дүн болов. Экспорт энэ оны эхний хоёр сард өмнөх оны мөн үеэс 177 сая ам.доллароор буурахад

• Нүүрс 445.9 сая ам.доллар,
• Хонь, ямааны мах 11.4 сая ам.доллар,
• Төмрийн хүдэр, баяжмал 11.3 сая ам.доллар,
• Боловсруулаагүй газрын тос 8.3 сая ам.доллар,
• Мал, амьтны самнасан үс, хялгас 7.5 сая ам.доллароор тус тус буурсан нь голлон нөлөөлжээ. 
• Төмрийн хүдэр, баяжмалын үнэ тонн тутамд 7.6 ам.доллар, нүүрсний үнэ тонн тутамд 46.3 ам.доллароор буурсан байна.

Экспортын сацуу импорт ч өссөөр.

Импорт өмнөх оны мөн үеэс 115.7 сая ам.доллароор өсөхөд суудлын автомашин 49.8 сая ам.доллар, дизелийн түлш 45.0 сая ам.доллар, тээврийн хэрэгслийн сэлбэг, эд анги 18.3 сая ам.доллар, гар утас 10.8 сая ам.доллар, ачааны автомашин 10.5 сая ам.доллароор тус тус өссөн нь голлон нөлөөлжээ.

Төсвийн тэнцвэржүүлсэн тэнцэл 565 тэрбум төгрөгийн алдагдалтай гарлаа.