ИЗНН-аас сонгогдсон УИХ-ын гишүүд цаг үеийн асуудлаар мэдээлэл өглөө.

Чуулганаар хэлэлцэх төсвийн тодотголын талаар намын дарга Б.Батбаатар “2024 оны төсвийг 22.7 их наяд төгрөгөөр батална гэсэн ч 5 их наядаар нэмэгдүүлж, 27 их наяд төгрөг болгон баталсан. Өнөөдөр төсвийн тодотголоор 3.1 их наяд төгрөг нэмснээр төсөв 30.2 их наяд төгрөг болон өөрчлөгдөж байна” гэдгийг хэлсэн.

Төсвийн талаар Эдийн засгийн шинжлэх ухааны доктор Д.Амгалан, Монгол Улсын 2024 оны төсвийн тодотгол болон 2025-2026 оны төсвийн хүрээний мэдэгдэлд зөрчлийн шинж чанартай, эдийн засаг, бизнест эрсдэлтэй зүйл байгааг мэдэгдье.

Төсвийн тодотгол, төсвийн хүрээний мэдэгдлийг дагаад Төсвийн тогтвортой байдлын хууль болоод 13 хуульд өөрчлөлт орж ирж байна. Энэ нь төсөв хяналтгүй болох, замбараагүй захиран зарцуулах, төсөв эзэнгүйдэх зэрэг нөхцөл байдал үүсгэлээ. Тухайлбал, тендергүйгээр төсвийн хөрөнгө оруулалтыг захиран зарцуулах эрх зүйн орчин бүрдсэн.

Мөн төсөв захиран зарцуулахдаа цөөнхийн бүлэг хяналт тавих нөхцөлийг зөрчиж, олонх нь төсвийн зардлын хяналтын дэд хороог удирдаж байна. Өөрөөр хэлбэл өөрөө захиран зарцуулаад өөрөө хяналт тавих нөхцөл бүрдсэн байна.

Тиймээс төсвөө хяналттай байлгаж, төсвийг эдийн засгийн эрэмбэд уялдуулах, орлого олдог зүйлд төсвөө оруулъя гэсэн саналтай байна. Мөн эдийн засгийн гадаад дотоод шокийг судалж байж, төсвөө төлөвлөх шаардлагатай гэв.