УИХ-ын гишүүн Ш.Бямбасүрэн өөрийн байр суурийг илэрхийлж нэг асуулт асуулаа. Түүний хувьд асуулт асуугаад ч хариулт авахгүй гэдгээ ойлгосон учраас бодлогын асуулт асуухгүй гэдгээ хэлсэн юм. 

УИХ-ын гишүүн Ш.Бямбасүрэн "Өнөөдрийн үүсээд байгаа нөхцөл байдал, талбайд байгаа залуусын бухимдал бол бол 2024 оны сонгуулийн үр дүнд бий болсон Засгийн газрын асуудал гэхээс илүү сүүлийн 5 жил завсаргүй Ерөнхий сайдаар ажилласан учраас эдийн засаг, нийгмийн олон салбарт хямрал үүссэнтэй холбоотой гэдгийг сануулж хэлмээр байна. Заримдаа ярьж байгаа сэдвээсээ хэтэрхий халиад байна.

Таны удирдаж байсан өмнөх Засгийн газар, энэ Засгийн газар бодлогын хувьд хангалттай сайн байгаагүй. Төр данхар байна, төрийн өмчид компанийг цомхон нээлттэй байна, хувийн хэвшилтэй өрсөлдөхгүй гэж ярьж байсныхаа эсрэг байна. Та МАН-ын бага хуралд АН гэрээ зөрчсөн гэчхээд одоо АН сайн ажилласан гэж хэлж байна. Таны үг авцалдахгүй байна. Манай намын дотоод асуудлаас болоод АН-ыг гаргаж байна гээд үнэнээ хэлчихсэн бол ойлгохоор байна. Ийм ил асуудалд гөлөг төөрүүлж байгаа юм шиг байх юм.

Маш олон бодлогын асуулт асуумаар байвч би таныг өнөөдөр хариулж байгааг хараад л байлаа. Байнгын хорооны хуралд ч тэр, чуулганы хуралдаанд ч тэр гишүүд маш тодорхой юм асуухаар яг гөлөг төөрүүлж байгаа юм шиг тодорхойгүй, хийсвэр юм руу аваачаад байх юм. Үр дүн нь айлгах, сүрдүүлэх маягтай байна. Гишүүдээр тодорхойгүй байдалд шийдвэр гаргуулах гээд байна. Тиймээс би танаас хариулт авна гэж итгэхгүй байгаа учраас асуулт асуумааргүй байна. Таны хэлсэн ялаа гэж яг хэн юм бэ. Шүүмжлэл хэлсэн залуус юм уу, танаас урвасан гишүүд юм уу. Хэнийг ялаа гэж хэлээд байгаа юм бэ" гэлээ. 

Үүний хариуд Ерөнхий сайд Л.Оюун-Эрдэнэ "Би ард түмнээ хэлээгүй улс төрийн ашиг хонжоо хайж байгаа улс төрчдийг хэлсэн" гэлээ.