Хөгжлийн банкнаас зарим асуудалд албаны тайлбар гаргажээ. Үүнд:

Аудитын төлбөрт 700.0 сая төгрөг төлсөн тухайд:

Монгол Улсын Хөгжлийн банкны тухай хуулийн 29.1-д заасны дагуу жил бүр Төлөөлөн удирдах зөвлөл нь  Аудитын  олон улсын нэр хүнд бүхий аудитын байгууллагаар санхүүгийн тайландаа аудит хийлгэж, дүгнэлтийг жилийн эцсийн тайлангийн хамт Монголбанк болон Засгийн газарт хүргүүлдэг хуультай.

Энэ дагуу 2024 оны аудитын ажлын төсвийг 2023 онд ТУЗ баталсан байх бөгөөд 2024 оны 12 сард ТУЗ “Эрнст энд Янг Монголия Аудит” ХХК-ийг сонгон шалгаруулж, тогтоол гаргасан. Ажил гүйцэтгүүлэх гэрээг Гүйцэтгэх удирдлага байгуулах хуультай.  Аудитын дүгнэлтүүдийг банк өөрийн цахим хуудсаар дамжуулан олон нийтэд ил тод мэдээлсэн.

Чанаргүй зээлийн төлбөрт хураагдсан хөрөнгө худалдан борлуулсан  тухайд:

Иргэний хуулийн зохицуулалтын хүрээнд болон Хөгжлийн банкны дүрмийн 9.2-т заасны дагуу банк нь шүүхээр шийдвэрлэсэн өрийн барьцаа хөрөнгийг өмчлөлдөө авч, үл хөдлөх хөрөнгийн бүртгэлд бүртгэн, нээлттэй сонгон шалгаруулалт болон цахим зарын хэлбэрээр борлуулж, мөнгөжүүлэх арга хэмжээг зохион байгуулдаг. Борлуулалтын мэдээллийг www.dbm.mn цахим хуудсаар дамжуулан нийтэд ил тод хүргэдэг. Сонирхсон этгээдтэй гэрээ байгуулан худалдаж, өмчлөлийг нь  шилжүүлдэг. Энэ хүрээнд худалдан авсан хуулийн этгээдэд өмчлөлийг шилжүүлсэн байна.

Цахим хуудас шинээр хийх тухайд:

“Хөгжлийн банкны тухай” хуулийн 21.5.3, ТБОНӨХБАҮХТХ-ийн 44.1–44.3, холбогдох журмын хүрээнд 2025 оны худалдан авах ажиллагааны төлөвлөгөөнд тусгагдсан цахим хуудас шинэчлэх ажлыг зохион байгуулж, тендерийн дагуу “Гэрэгэ Дижитал Текноложи” ХХК-тай гэрээ байгуулсан. Хөжлийн банкны үйл ажиллагааны талаар хөрөнгө оруулагч, харилцагчид үнэн зөв, мэдээллийг хүргэх үндсэн суваг учраас ТУЗ 2025 оны ажлын төлөвлөгөөнд тусгаж, баталсан ажил байсан.

Эх сурвалж: Хөгжлийн банк