"Mission: Impossible" буюу "Биелэгдэшгүй даалгавар" цувралын сүүлийн ангид гүйцэтгэсэн аюултай үзүүлбэрээрээ жүжигчин Том Круз Гиннесийн амжилтын номд нэрээ бичүүллээ.

Гиннесийн номын комиссын мэдээлснээр, Круз “шатаж буй шүхэртэй хамгийн олон удаа үсрэлт хийсэн хүн” хэмээх шинэ ангилалд бичигджээ. Тэр өндрөөс, шатаж буй шүхэртэй нийт 16 удаа үсэрсэн байна.

“Том зөвхөн тулаант киноны баатрын дүрд тоглодоггүй. Тэр өөрөө жинхэнэ баатар. Түүний амжилтын гол түлхүүр бол бодит байдлыг эрхэмлэж, гол дүрийн жүжигчин юуг хийж чадахыг туйлд нь хүртэл шалгадагт оршдог” хэмээн Гиннесийн амжилтын номын Ерөнхий редактор Крейг Глендей мэдэгдэлдээ дурджээ. 

Мөн тэрбээр нэмээд “Түүний айдасгүй бөгөөд эр зоригтой зан чанарыг энэхүү шинэ дээд амжилтаар хүлээн зөвшөөрч, шагнаж байгаадаа бидний хувьд ч нэр төрийн хэрэг” хэмээн онцолжээ.

Том Круз энэхүү шатаж буй шүхэртэй үсрэлтээ алдарт кино цувралын наймдугаар анги болох  “Mission: Impossible-The Final Reckoning” буюу "Биелэгдэшгүй даалгавар-Эцсийн зогсоол"-ын зураг авалтын үеэр хийжээ. 

Энэхүү үзүүлбэр нь түүний анхны аюултай үйлдэл биш. Өмнө нь олимпын үеэр үзүүлсэн тоглолт болон өөрийн кинонуудын бүх аюултай хэсгүүдийг орлон тоглогчгүй өөрөө гүйцэтгэдэг гэдгээрээ Круз алдартай билээ. Тэрбээр 1996 оноос хойш энэхүү кино цувралын гол дүрд тоглож байгаа юм.

Эх сурвалж: CNN