УИХ-ын чуулганы өчигдрийн /2025.06.12/ нэгдсэн хуралдаанаар Г.Занданшатарыг Ерөнхий сайдаар томилох асуудлыг хэлэлцэж, гишүүд нэр дэвшигчид асуулт тавьж, хариулт авсан юм.  

Энэ үеэр УИХ-ын гишүүн Ө.Шижир, Сүүлийн 10 жил дараалан МАН засагласан. Таныг 2019 онд УИХ-ын даргаар томилогдож байхад улсын төсөв 11.5 их наяд төгрөг байсан. Зургаан жилийн дараа 33.4 их наяд болсон. Төсөв гурав дахин өссөн ч иргэдийн орлого гурав дахин өсөөгүй.
2020 оноос хойш гол нэрийн барааны үнэ 55 хувиар өссөн. Инфляци 8.3 хувьд хүрч, хоёр оронтой тоонд ойрхон байна.

Та төсвийн давхардлуудыг арилгана гэж ярьсан. Жишээ нь, Эрчим хүчний яам, Эрчим хүчний үндэсний хороо, Эрчим хүчний үндэсний хороо зэрэг байгууллагуудын давхардлыг арилгаарай гэж хүсэх гэсэн юм.

”Миний алдаа, оноо ил байдаг” гэж та хэлсэн. Иргэд үзэл бодлоо илэрхийлснийх нь төлөө эсвэл сэтгүүлчид хэвлэн нийтэлснийх нь төлөө дарга, цэрэг нар гомдож, цагдаагийн байгууллагад ханддаг байж болохгүй. Та өөрийн бүрэн эрхийг хэрэгжүүлэх хугацаанд таны болон танай Засгийн газрын гишүүд үзэл бодлоо илэрхийлсэн сэтгүүлчид болон хэвлэл мэдээллийн байгууллагууд, иргэдийг нэг ч удаа гомдол гаргаж, хуулийн байгууллагад өгөхгүй гэж Та амлаж чадах уу?

Г.Занданшатар, Бид амлалт өгөөд байдаг биш, ажил хэрэгч Засгийн газар байхыг эрмэлзэнэ. Ер нь амлалт олон янз. Тодорхой хэлбэл, Занданшатарыг юу ч гэж хэлж болно.

Гэхдээ Занданшатарыг шүүмжлэх гэж байна гээд хүний эрхийг зөрчиж, гэр бүл, үр хүүхэд, бусад гэмгүй хүмүүсийг хэлмэгдүүлсэн аливаа бодлогыг зөвшөөрөхгүй.

Хуулийг дээдэлж, хуулийн засаглалыг хэрэгжүүлж ажиллана. Төрийн нэр хүнд, ард түмнийг итгэлтцлийг дааж ажиллах нь хамгийн чухал гэв.